MUKAH: Perintah Gabungan Parti Sarawak (GPS) setuju ngemendarka Kaunsil Pemansang Industri Apong Sarawak.
Kepala Menteri Datuk Patinggi Abang Johari Tun Abang Openg madah belanja dikena ngepun disuaka ngagai kaunsil nya enggau penyampau RM5 juta.
“Kitai setuju numbuhka Kaunsil Pemansang Industri Apong Sarawak enggau belanja dikena ngemun RM5 juta,” ku iya lebuh bejadi Pengerami Gawai Raya enggau GPS Zon 10 ba Rumah Panjai Kalang Ulu Bayan.
Sarawak iya nya nengeri eksport ke besai asil apong lalu nya agi bisi peluang ti besai sereta begunaka lebih agi pengawa pemansik.
Berindik enggau nya, iya mega madah bumai bekebun amai beguna ke nengeri tu tang chara baru patut dikena nyadika industri bumai bekebun nyungkak agi penatai pemisi.
Tu enggau bekenaka teknologi sereta chara baru ti ulih ngenataika asil ke dikeluarka mayuh agi.
“Kitai deka ngena chara baru iya nya ‘Artificial Intelligence’ (AI) enggau robotik ba dalam industri bumai bekebun,” ku iya.
Dikena nyukung penaluk nya, bisi 600 tiang telekomunikasyen deka didiri ba taun 2020 nyengkaum ba menua pesisir.
Kerejasama enggau Agensi Nuklear Malaysia mega deka nentuka nadai penanggul nyadi ba pemansang tiang ke dipadah nya.
Nyebut pemansang bekal ai, elektrik enggau jalai alun, nya siti bajet ke besai ti mungkur kandang endur menua pesisir enggau semua nya ba dalam proses dipejalaika.
“Enti semua pemansang nya tembu, kitai deka ngena enggau ngempung semua pengering lalu kitai meda asil dikena ngemansangka Sarawak lalu ti ulih mai nengeri ti pemadu mansang ba taun 2030,” ku iya.
Berebak enggau nya pengawa nyua ka Surat Hak Bempu Tanah Seksyen 18 Kanun Tanah Nengeri (NCR) ba baruh Inisiatif Baru Nyukat enggau Tanah Hak Adat Bumiputera (NCR) ba Sungai Bayan Balingian sereta Sungai Kebuin enggau Sungai Menjumo Batang Balingian, Mukah ti ngeluarka 202 Surat Hak Bempu lalu bisi 130 iku orang nerima.
Sama bisi datai ngulu pengerami nya Sapit Kepala Menteri Datuk Amar Douglas Uggah Embas enggau Menteri Pengelantang Pendiau Raban Bansa, Orang Indu, Ruang Bilik enggau Pemansang Nembiak Dato Sri Fatimah Abdullah sereta bala temuai ke dipebasa ke bukai.