MUKAH: Kepala Menteri Sarawak Datuk Patinggi Abang Johari Tun Abang Openg minta servis iya diteruska agi ngagai siti penggal ba baruh Gabungan Parti Sarawak (GPS) dikena mantaika Sarawak nadai deka bankrap.
Berebak enggau nya, iya nyakal jaku petenah Menteri Pekara Wang Lim Guan Eng ke madah sentang agih belanja ungkus RM11 bilion, nengeri tu deka bankrap dalam timpuh tiga taun aja enggau rizab RM30 bilion.
“RM11 bilion tu semina belanja aja, nama kebuah enda dikira sekali enggau penatai pemisi, bakani nuan ngira akaun,” ku iya lebuh pengawa ngintu pengerami Gawai Raya enggau Ngelancharka Gabungan Parti Sarawak (GPS) Zon 10 ba Rumah Panjai Kalang Ulu Bayan.
Sarawak ku iya ngembuan penatai pemisi ari mayuh bengkah penatai baka dividen, royalti enggau mega premium asil chukai ari asil minyak enggau gis.
Ba 2019 aja, Sarawak udah bisi bulih asil penguntung ari asil eksport minyak enggau gis penyampau RM3 bilion.
Ku iya, tu bedau agi nyengkaum sentang siti agi hak ba atas minyak enggau gis ti deka dipadah iya pengunjung taun ila.
Senentang ba rizab RM30 bilion nengeri, nya mega ari asil pengawa bala anak Sarawak ke udah bebendar bejalaika tanggungpengawa sereta ngurus belanja nengeri sebedau tu.
Bisi mega bejaku iya nya Opis Menteri Pengintu Pengelantang Pendiau, Komuniti, Orang Indu, Ruang Bilik enggau Pemansang Anak Mit Dato Sri Fatimah Abdullah.
Bela sama bisi datai ba pengerami tu iya nya Sapit Kepala Menteri Datuk Amar Douglas Uggah Embas enggau bala pemesai ke bukai.