SIBU: Sarawak Workers Party (SWP) nyambut manah pengawa perintah nengeri Sarawak ti deka meli bilun kargo dikena nganjung asil betanam betupi nengeri tu ngagai Singapura.
Mandal Presiden SWP David Munan madah, taja pan enda sama penemu politik tang ba sida pengawa ke manah baka nya iya ke mai pemaik ngagai menua patut disukung lalu pia mega tau ditingkah nyema enda engkeman.
“SWP meri jaku puji ngagai Kepala Menteri laban tu mandangka iya berani nambahka pengawa betanam betupi ditu lama udah enda diseleti manah agi. Agi baka kelia,” pia ku iya madah ngagai pengarang berita, kemari.
Iya madah, pekara tu patut ditimbal semua piak baka orang betanam betupi, ejeni sereta opis ti bekaul ngambika mujur.
“Tentuka nengeri kitai udah tu ila enda suntuk produk tauka asil betanam betupi ngambika bisi dijual ngagai menua Singapura,” ku iya madah baru.
David madah, nama-nama pengawa ti ngangkatka pengawa betanam betupi patut disukung semua laban nya chara ke dikena ngemanahka agi tikas penatai pemisi ruang bilik di menua pesisir.
“Pengawa betanam betupi di nengeri Sarawak patut diseleti manah agi nyengkaum ngaul rebak baru ti bisi pelajar.
“Pia mega raban tu meseti disukung kitai, diembing kelimpah diberi bantu ngambika sida mujur ba pengawa tu,” pia ku iya sambil madah pengawa betanam betupi ukai muntang digaga enti deka bulih pemujur.
Bekaul enggau mayuh rumah panjai di menua pesisir empai datai jalai, ku David, pekara nya meseti diperundingka enti deka meda sektor betanam betupi tu mujur.
“Nya alai, SWP bela minta perintah berunding baka ni nyaup sida ke empai datai jalai ti mengkang nengah sungai tauka agi merau tu.
“Ambika banding sida tu diberi subsidi baka dikena meli perau enggau injin ngambika sida lantang bekebun,” ku iya madah.