Anda di sini

Shell Timur, KTS Trading ngatur pengerami Gawai Raya enggau anak patu balu di Peryatim Bintulu

Advertisement
 Lau (dua ari kiba) nyuaka bantu mata duit ngagai pengari Palan Peryatim Bintulu lalu dikemata Tiong (kiba) enggau Phua (dua ari kanan).
UNGKUP KITA: Lau (dua ari kiba) nyuaka bantu mata duit ngagai pengari Palan Peryatim Bintulu lalu dikemata Tiong (kiba) enggau Phua (dua ari kanan).

BINTULU: Shell Timur enggau KTS Trading Sdn Bhd kemari bisi ngatur pengerami ngintu Gawai enggau Hari Raya begulai enggau bala anak patu balu ari Palan Peryatim  Bintulu ba Kampung Jepak.

Orang ke ngempu Shell Lubricant Kevin Lau ba jaku iya madah pengerami ti bakatu digaga tetiap taun nyadika siti aktiviti tanggungpengawa rama korporat.

“Kami beterima kasih ngagai tim pengatur Peryatim Bintulu enggau bala nembiak ketegal sambut ti chukup manah lalu ngemujurka kami ngatur pengawa berami begulai bakatu.

“Kitai benasit manah laban ulih bekunsi pengaga ati enggau bala nembiak lebuh kitai nyambut pengerami ke diintu mayuh bengkah pupu raban bansa,” ku Lau.

Nitih ku iya, iya madah bala pengereja pengawa ulih berandau begulai enggau bala nembiak sereta ngambi bagi ba dalam aktiviti sida.

“Nuju kita bala nembiak aku ngarap kita beratka pelajar laban semina pelajar aja ulih mai penyenang ngagai pengidup lalu ti kita udah mujur ba dalam pengidup, anang enda bekunsi enggau bala komuniti ke bukai,” ku lalau Lau.

Sama bisi ngulu pengerami nya Menijer Akaun Shell Timur Philip Phua, Menijer KTS Trading pampang Bintulu Tiong Hoo Chiong enggau bala pengereja pengawa KTS.

Bala nembiak mega bisi diberi perengka kena belajar lalu derma mata duit diberi ngagai pengurus Peryatim Bintulu.

Advertisement