SIBU: Sarawak enda deka bankrap baka ke dipadahka Menteri Wang Lim Guan Eng laban nengeri tu bisi mayuh macham penatai asil baka minyak enggau gis lalu ketegal penegap pengawa ngatur bajet enggau manah, pia ku Kepala Menteri Datuk Patinggi Abang Johari Tun Openg.
Abang Johari nyangkal dawa Lim, ti nanya nama kebuah semina penyampau belanja taun nengeri dikira lalu nadai meri penguntung.
“Kitai bisi penguntung ari dividen, royalti enggau chukai ari asil minyak enggau gis,” ku iya bejaku ba pengerami Gawai Raya sereta bejadika GPS Zon 10 ba Rh Kalang, Bayan Ulu Mukah kemari, ti mega disempulang Sapit Kepala Menteri Datuk Amar Doughlas Uggah Embas.
“Perintah nengeri nengah GPS iya nya perintah ti bempu tanggungpengawa enggau ngatur belanja enggau manah,” ku iya nekan.
Nitih ku Abang Johari, Sarawak dipelabaka bulih penatai pemisi RM3 bilion ari asil untung ke taun tu.
“Tu enda dikira ari asil minyak enggau gis ti dipelabaka deka dipadah ujung taun tu ila,” ku iya nambah.
Berindik enggau nya, tu mantaika GPS endang patut dikearapka ulih terus megai Sarawak, pia ku Abang Johari nyemetak.
Dulu ari nya, Menteri Pengintu Pengelantang Pendiau, Raban Bansa, Orang Indu, Ruang Bilik enggau Pemansang Nembiak Mit Dato Sri Fatimah Abdullah sama bisi ngenataika jaku ba pengawa ke sama.
Berebak enggau nya, Lim diripotka meri jaku tangkan ngagai rayat Sarawak ke alai nengeri nya deka bankrap ba dalam timpuh tiga taun ti deka datai ba baruh pegai Gabungan Parti Sarawak (GPS).
Iya mega ngeripot madah Sarawak ke nyimpan RM30 bilion deka abis ba dalam timpuh tiga taun enggau bajet ninting taun iya nya RM11 bilion.
Ba pengerami makai lemai ngumpul belanja DAP Sarawak ke diatur ba Kuching kena Hari Lima, Lim madah nengeri tu deka nyadi baka Kelantan, ketegal perintah ti megai enggau enda manah, pia mega enda ulih mayar gaji bala pengereja pengawa.
“Lalu sida nginjau duit ari perintah besai dikena mayar gaji bala pengereja pengawa sida lalu aku udah ngemendarka RM20 juta dikena tuju nya,” ku sekretari besai DAP.
Taja pia, Abang Johari udah madah asil nengeri taun 2019 dipelabaka datai ba penyampau RM10.51 bilion, ti nyengkaum chukai jual asil petroleum enggau penyampau RM3.84 bilion.