KUCHING: Perintah deka terus chakah ngaga sereta ngemansangka infrastruktur nyengkaum ba kandang menua tebing tasik di nengeri tu.
Kepala Menteri, Datuk Patinggi Abang Johari Tun Openg madahka, nengah chara ngemansangka infrastruktur nya deka ulih ngangkatka tikas pengidup enggau ekonomi raban bansa.
“Nama utai ke digaga perintah diatu, deka neruska pengawa ngaga jalai tebing tasik nengah pengawa ngena tauka ngemansangka jematan.
“Tu udah tentu deka meri awak ngagai kitai muka jalai di kandang menua tebing tasik, lalu ngambika ulih nyadi pelasar ekonomi raban bansa kitai.
“Nengah pengerami Hari Raya tu, aram mih kitai sama mekuh ngagai pekara tu enggau nyungkak pengeransing ba pengawa ngangkatka tikas pengidup raban bansa sereta ulih bejalaika pengawa enggau regas agi di dalam pemansang ekonomi ti benung nyadi ba nengeri kitai,” ku iya.
Abang Johari mansutka pekara nya lebuh bejaku ba Majlis Kesyukuran Aidilfitri Agensi-Agensi Islam Tahun 2019 ke negan tema Beraya Ala P.Ramlee ti diatur ba Dewan Majma’ Tuanku Abdul Halim Mu’adzam Shah, Kompleks Islam Sarawak ditu, malam ensanus.
Pengerami nya digulu, Tuan Yang Terutama Yang di-Pertua Neger Tun Pehin Sri Abdul Taib Mahmud enggau bini iya Toh Puan Datuk Patinggi Raghad Kurdi Taib.
Dulu ari nya Abang Johari ngingatka raban bansa Islam enti deka maju patut bepelasarka ngagai penemu ngambika ulih nitihka segang pemansang enggau ubah teknologi di dunya diatu.
“Enda ulih dikeenggaika iya nya enti raban bansa Islam deka mansang patut beteraskan penemu, nya kebuah kitai meransang bala anak Islam ngambika mekuh tauka numpu ngagai pelajar.
“Kitai mega deka bala anak Islam ngambuan penemu pemadu baru beteraskan ngagai ubah ti nyengenda (nyata) di dunya kemaya hari tu nyengkaum ngena barang tauka kereban ti canggih di dalam kitai ngiga pengidup meruan ba dunya enggau ‘akhirat’,” ku iya.
Sama bisi datai ba pengerami nya kemari, bini kepala menteri, Datin Patinggi Datuk Amar Juma’ani Tun Tuanku Bujang, Menteri Muda Lekterik Menua Pesisir ti mega megai tanggungpengawa nyaha Pekara Islam nengeri tu Datuk Dr Abdul Rahman Junaidi enggau bini iya Datin Siti Syorgayah Ahmad Zaidin sereta yang Dipertua Majlis Islam Sarawak Datu Misnu Taha.