MIRI: Perintah Pakatan Harapan (PH) dipinta ngambika nerus semua projek ungkup rayat ke bisi ditinggalka perintah sebedau tu.
Menteri Muda Dagang Temuai, Seni enggau Main Asal, Datuk Lee Kim Shin madah taja pan perintah udah betukar megai menua, pemansang ke digaga perintah ke dulu meseti terus dipejalaika.
“Bisi projek ti udah disemaya ke perintah dulu suba lalu udah dikemendarka patut diperunding awakka digaga.
“Nyadi kitai ngarap perintah besai ti dipegai Pakatan Harapan (PH) neruska projek nya,” ku iya maya ba pengerami ‘Majlis Ramah Tamah Gong Xi Gawai Raya’ ke diatur Gerempung Apai Indai enggau Pengajar (PIBG) Kolej Vokasional Miri, malam kilah ensana.
Lee nerang sentang semaya perintah ke dulu deka ngemesaika agi Kolej Vokasional nya sereta deka meri kus tikas diploma.
“Pelin deka ngemesaika agi Kolej Vokasional udah kala dikemendarka perintah ke dulu tang nya enda diteruska laban betukar perintah ke megai menua.
Kitai ngarap perintah baru ulih neruska semua projek ke beguna bendar ti bekait enggau pelajar sekula teknikal Kolej Vokasional,” ku iya.
Adun Senadin nya madah, nengah kapasiti kolej ti besai nya, nyadi institusyen pengelatih nya ulih ngambi mayuh agi nembiak sekula menua tu ngambi ba kus teknikal.
“Kitai di Sarawak amat begunaka mayuh nembiak sekula vokasional lalu kitai deka menteri pelajar meri awak ngagai bala nembiak menua tu ngambi kus ba teknikal khas iya di Kolej Vokasional,” ku iya.
Lee mega ngarap perintah PH ulih berundingka baru jalai pengawa deka ngemesaika Kolej Vokasional nitihka guna peminta kereja kemaya hari tu.
“Kus teknikal diatu nyadi batang tuju perintah nengeri deka ngadaka pekereja ti bepengelandik tinggi lalu nya kebuah sigi patut kitai ngembuan Kolej Vokasional ti besai alai kitai ngambi mayuh agi orang latih,” pia ku iya.
Lee mega madahka agih bantu enggau penyampau RM5,000 ngagai Kolej Vokasional ke deka nyereta ba pengawa Karnival Lumba enggau Main di Johor.