KUCHING: Peranak Sarawak kelebih agi raban nembiak deka ke perintah ti tegap sereta negika hak nengeri tu lalu ulih ngamatka peminta rayat.
Penemu ti baka nya dibantaika maya bejuraika penemu dalam ‘Sarawak, What Next?’ entara Parti Tindakan Demokratik (DAP) - Parti Sa’ati Rayat Sarawak (SUPP) - Parti Bumi Kenyalang (PBK) ba sebuah hotel ditu, kemari.
Moderator jurai nya ketuai The Movement for Change Sarawak (MoCS), Francis Paul Siah.
Sekretari Besai SUPP, Milton Foo madahka Sarawak begunaka perintah ti tegap sereta bebendar negika hak nengeri.
bekaul enggau hak Sarawak baka ti udah disemaya Sempekat Malayai 1963 ku iya, Sarawak patut meri timpuh sereta nyema perintah besai enda ulih nerima peminta, nengeri tu patut nyingkang jauh agi.
“Kitai begunaka perintah ti tegap, kitai begunaka mandat ti penuh dikena nentuka perintah tegap ungkup rayat ti deka ke hak sereta nuju siti juluk ke sama,” ku iya.
Foo berebak enggau tu madahka dalam politik nadai betul enggau salah, sekalika nuan rindu tauka enda ngagai sesebngkah parti, tang kitai ngereja nya ke Sarawak lalu semua kitai peranak Sarawak.
“Anang enda ingat, kitai semina bisi siti rumah, nadai rumah bukai, kitai sayauka Sarawak lalu Sarawak tu rumah kitai, kitai semina bisi Sarawak laban kitai ada ba Sarawak lalu kitai peranak Sarawak,” ku iya lebuh ke nyimpul jurai iya.
Nambahka nya Sosialis Nembiak DAP Sarawak Abdul Aziz Isa bepenemu nyema Pakatan Harapan (PH) nyadi perintah nengeri, udah tentu PH deka ngaga baru nengeri tu sereta merintah bepelasarka perintah ti manah.
Aziz arap bendar pemesai PH ngembuan integriti sereta bisi tanggungpengawa.
“Kitai deka bisi ketuai ti tegap, bisi penemu tauka pandai sereta bisi tanggungpengawa ngiring nengeri.
“Aram meh kitai ngangkatka bansa kitai, mansangka menua kitai, ngemujurka pengawa kitai ngetanka tanah kitai,” ku iya.
Kelimpah ari nya PBK ti diarika Presiden iya, Voon Lee Shan lebuh ti bejuraika ‘Sarawak, What Next?’ lebih ngenang pengulih Sarawak ngatika diri, ti mega siti kebuah parti ke baru dipegai iya ditumbuhka.
Pengawa jurai nya ti diatur urung dua jam setengah, bejalai enggau lanchar ti dikemataka urung 100 iku penyukung bisi datai ngemataka jurai nya.