SIBU: Pengerami nyambut Ngiling Bidai pelasar ke engkeman dikena mandangka pemanah sereta penyelai bansa Dayak ti dikemeranka ari kelia.
Kaban Parlimen (MP) Lubok Antu Jugah Muyang madah, pengerami nya ukai semina disambut Dayak aja tang bela ngangauka bansa bukai ngerami ngelai Gawai udah tembu.
“Kitai ditu betuah amat laban nama pengerami disambut endang digulu pupu bansa tang ukai semina dirami bansa ke nyambut aja.
“Nya alai, enti deka meda pemanah kaul enggau pangan diri tau dipeda ba nengeri kitai Sarawak aja,” pia ku iya madah.
Iya mantaika jaku tu maya Pengerami Ngiling Bidai Rumah Milai, Panggang Lubok Antu, ensana.
Ba penegrami nya, Jugah meri geran RM100,000 dikena ngemanahka rumah panjai nya.
Kelimpah ari nya, iya mega ngungkupka RM15,000 ngagai Komiti Pengelikun enggau Pemansang Genturung Pendiau (JKKK) rumah panjai nya ngambika bisi dikena ngaduka program sida.
Ba pekara bukai, Jugah madah, perintah besai naka alah ngatur pemansang ngambika ulih ngangkatka tikas pengidup rayat di menua pesisir.
Tang ku iya, bala tuai rumah enggau tuai raban bansa bela nentuka pengelikun rayat semampai dijaga kelimpah ngetanka penyerakup ke bisi diatu.
“Pia mega, kitai meseti ngembuan timpai ke jauh, enda ngira penemu politik tang besaup ngemansangka Parlimen Lubok Antu,” ku iya sambil madah perintah Pakatan Harapan (PH) nadai penanggul mai pemansang ngagai rayat lebih agi diatu sida ngemeratka pemansang di menua pesisir ti jauh bida ari mengeri.
Pengerami sehari nya diintu enggau richah sereta disempulang enggau beberapa iti program.