SARIKEI: Parti Sa’Ati Rakyat Sarawak (SUPP) enggau ati ti gaga ngelaluka kaban baru kelebih agi bala pengundi biak ngagai pampang Sarikei, pia ku Kaban Kunsil Nengeri Repok, Dato Sri Huang Tiong Sii.
Ku iya, penambah penyampau kaban nya beguna amat dikena ngentapka penuduk parti, kelimpah nentuka penegap parti nya jemah ila, kelebih agi ba pengawa ngentapka agi Gabungan Parti Sarawak (GPS) napi pengawa bepilih nengeri ti deka datai.
“Pengawa nya beguna amat dikena nentuka nengeri kitai seruran bisi kompenen parti ti diuluka peranak nengeri tu empu ti ngambika seruran kering sereta ngembuan ketuai ti nemu sentang penanggul ba renggat nembiak redak,” ku iya.
Huang jaku munyi nya ba aum Kaban Komiti (AJK) Besai Raban Nembiak enggau pampang Indu Sarikei, ke diatur ba Bilik Aum Servis Mensia Mayuh DUN Repok, kemari.
Ba awak ke sama mega, Huang bisi nerima pom nyadi kaban lebih 100 iku kaban baru baka ari ex- kaban Parti Rakyat Bersatu (UPP) lalu ke bukai nya, individu ti nadai ngarika barang bagi parti.
Ku Huang, nengah komitmen penuh perintah ari baruh iring Kepala Menteri ku iya, rayat bisi peluang ngasaika tikas idup ke meruan agi dibanding enggau ke sebedau tu.
“Perintah GPS merambu deka ngemujurka semua projek nyari dalam konteks pemansang holistik ke deka ngubah nasit rayat menua pesisir n yengkaum di emperan Rajang.
“Projek ngaga Jematan Batang Rajang enggau jalai alun ke Tanjung Manis sebagi ari pengawa perintah ke besai amat reti dikena nyungkak tikas ekonomi peranak menua nya.
“Semua projek tu mega deka ngubah kandang menua nya nyengkaum Tanjung Manis enggau ke ngelinggi kelimpah ngemujurka beberapa iti agi perambu projek pemansang ke baru di kena nentuka pemaik ari nya ulih diasaika semua serap rayat,” ku iya.
Program nya udah digulu 190 iku kaban parti nyengkaum Mandal Chairman SUPP Sarikei, Kaptian Ling Dien Yong.