KUCHING: Parti Sarawak Bersatu (PSB) pechaya Opis Nagang Ulah Makai Suap Malaysia (SPRM) bejalaika pansik enggau lurus bekaul kes 1Malaysia Development Bhd (1MDB).
Urusetia PSB ba sebengkah penerang ditu kemari madah, sida ngarapka kes nya enda diketu naka ngambi atur sivil aja tang atur ti mungkur semua.
“Kitai sama nemu SPRM bisi memfailka peminta ningkilka sivil ngagai beberapa individu enggau entiti nyengkaum sebuah parti politik ari Sarawak.
“Kami pechaya SPRM deka bejejimat sereta silik ba pansik lalu ukai ngetu semina naka atur sivil aja,” ku iya.
PSB madah munyi nya lebuh ngenang sentang atur SPRM memfailka peminta ningkilka sivil ngagai 41 responden ngambika bulih baru duit urung RM270 juta ti bisi kaul enggau 1Malaysia Development Bhd (1MDB) ke dibantaika Ketuai PRM Latheefa Koya, kemari.
Ku PSB, nyama bisi ngelanggar undang-undang nyengkaum Akta ‘Pencegahan Pengubahan Wang Haram’ enggau ‘Pencegahan Pembiayaan Keganasan’ (AMLA), opis bekuasa nyengkaum Gerempung ke Berejista patut anang nangi neritka atur.
Ku iya baru, sebuah parti ari Sarawak dke nerima duit ari ex-Menteri Besai Datuk Seri Najib Tun Razak udah diripot ngagai kepada SPRM sebedau Pengawa Bepilih Besai Ke-14 (PRU14), tang nadai sebarang atur diambi.
“Balat ngenyinuka maya nemu atur ke diambi Ketuai SPRM ke baru nya.
“Nya alai, kami ngansak ngambika pansik mungkur semua sereta lurus ulih dipejalaika ba pekara tu,” ku Urusetia PSB.
Berebak enggau nya, PSB minta semua parti politik denggau bala ketuai enggau ati ke lurus madahka sentang duit ke diterima sida ari ex- menteri besai ngambika nya ulih mantu SPRM bejalaika pansik.