KUCHING: Nembiak sekula Primari di serata nengeri tu diperansang masuk Pekit Ngarang Integriti ti diatur Unit Integriti enggau Ombudsman, Opis Kepala Menteri (UNION) nengah kerejasama enggau Gerempung Penulis Sarawak (PENULIS) ti berengkah ari bulan Jun ngagai 30 November 2019.
Menteri ba Opis Kepala Menteri (Integriti enggau Ombudsman), Datuk Talib Zulpilip madah, pekit nya tebuka ngagai peranak Sarawak enda ngira dini endur diau enggau peranak ari nengeri bukai ke diau mendam di nengeri tu.
Entara tuju pekit ngarang integriti tu diatur ku iya, dikena meri penyedar ngagai raban bansa bekaul enggau isu Integriti enggau Makai Suap, kelebih agi ngagai bala raban biak tauka nembiak nengeri tu.
“Nengah pekit tu kitai ulih ngangkatka penyedar raban bansa bekaul integriti enggau makai suap sereta ngambika ulih nerenak peemaik integriti dalam ruang bilik, raban bansa, nengeri enggau menua.
“Lalu asil ari pekit tu deka digumpul sereta digaga nyadi bup ngambika ulih dibacha tauka nyadika lalau raban bansa.
“Ke sekali tu, ti pemadu narit ati Pekit Ngarang Integriti 2019 diatur UNION enggau PENULIS mega bisi tebuka ngagai nembiak sekula Primari ari Tahun 1 ngagai Tahun 6,” ku iya dalam aum pengarang berita Pekit Ngarang Integriti 2019 ke diatur ba opis iya di Begunan Baitulmakmur ditu, kemari.
Tema pekit ngarang integriti 2019 iya nya “Sarawak Nengeri Maju Beintegriti Tinggi Ba Taun 2030”.
Iya madahka pekit ungkup sekula primari deka neladan metodologi pelajar tumu anak mit Singapura, ke alai nengah pekit ngarang enggau esei Integriti 2019, ditetapka dua kategori iya nya kategori A ungkup nembiak Tahun 1 ngagai Tahun 3 ke alai ulih milih tajuk ke diberi ke pemanjai 100 leka jaku.
Lalu kategori B, ungkup Tahun 4 ngagai Tahun 6 ti mega sama ulih milih tajuk ke diberi ke pemanjai 300 leka jaku aja, ku iya seraya madahka tajuk mudah ungkup sekula primary.
“UNION enggau PENULIS setuju nyendiaka perais khas ngagai sekula ti pemadu mayuh enggau bepekit ngarang esei,” ku iya.
Taun tu ku iya, UNION enggau PENULIS deka bekerejasama ngatur Pekit Ngarang Leka Main, Cherpan Jaku Melayu, Cherpan Jaku Iban, Esei JaKu Melayu enggau Pekit Ngarang Esei Jaku Inggeris.
Nitihku Talib pekit ke sekali tu raban pengatur ngemeranka teknologi CR Code dikena ngemuntangka mensia mayuh ngambi atur pekit enggau pom pekit rasmi.
“Mensia mayuh ke deka ngambi bagi semina scan QR Code pekit dikena ngulihka penerang silik pasal pekit kelimpah ari tau diambi ba ‘link’ ke bisi disediaka iya nya http//penulissarawak3.wixsite.com/pertandingan,” ku iya.
Penerang tu tau mega ditanya ngagai Urus Setia Pekit Ngarang UNION/PENULIS Integriti 2019 ba lumur 012-8858887 (WhatsApp) enggau 011-37178788 tauka email ngagai [email protected] tauka faks 082-646471.
Sama bisi datai kemari Presiden PENULIS Zaid Zaidel Jamil enggau Sapit Presiden PENULIS Ali Hosen Abang enggau ke bukai.
Nyerumba nya kemari opis Unit Intgeriti enggau Ombudsman bisi ngatur pengerami Gawai Raya.