Anda di sini

Industri asil pengelandik jari Sarawak majak ngerembai

Advertisement
 Mohamaddin disempulang temuai dipebasa bukai begambar bebala mayuh enggau ke bukai.
ALBUM GAWAI RAYA: Mohamaddin disempulang temuai dipebasa bukai begambar bebala mayuh enggau ke bukai.

KUCHING: Industri pengelandik jari Sarawak ngayanka pemansang ti majak manah lebuh ngerikod puku rata rega asil nyual produk pengelandik jari urung RM2.7 juta sebulan ba taun tu.

Menteri Dagang Temuai, Seni enggau Main Asal,Datuk Mohamaddin Ketapi madah, puku rata rega jual nya niki sepenyampau 8 peratus dibandingka urung RM2.5 juta sebulan taun nyin kemari.

Ku iya, dalam timpuh bulan Januari ngagai Mei taun tu,Sarawak ngerikodka rega nyual barang pengelandik jari sepenyampau RM13.6 juta.

“Tu siti penyampau ti besai dibandingka enggau nengeri bukai ti ngeluarka barang pengelandik jari ke alai taun nyin kemari Sarawak mega ngerikodka rega jual pengelandik jari sepenyampau RM30.5 juta.

“Nya alai kitai berasai puas ati ngagai bala pengemeran pengelandik jari di Sarawak sereta pemendar kitai dalam tu deka dichakahka agi ngambika penyampau ke dikeluar enggau penatai pemisi pengemeran ulih ditambahka agi,” ku iya.

Iya mansutka pekara nya ba aum pengarang berita pengudah bejadika pengerami Hari raya Aidilfitri enggau Gawai Dayak diatur Kaunsil Pemansang Asil Pengelandik Jari Malaysia ba Indu Opis Asil Pengelandik Jari  Malaysia Pampang sarawak, Jalai Stadiaum ditu malam ensanus.

Lebuh ke ngenang asil jual barang pengelandik jari serata Malaysia, Mohamaddin nerangka, taun nyin kemari penyampau rega asil ari nyual nya ngerikod penyampau RM506.5 juta enggau pukul rata rega ke dijual tiap bulan sepenyampau RM42.2 juta.

“Dalam timpuh Januari ngagai Mei taun tu, rega asil nyual pengelandik jari sepenyampau RM211.9 juta enggau puku rata rega asil sebulan manggai RM42.4 juta sebulan,” ku iya.

Ngenang pasal penyampau pengemeran pengelandik jari di Sarawak, iya madahka bisi niki sepenyampau 28 peratus iya nya 932 iku ba taun tu dibandingka 730 iku taun nyin kemari.

“Serata Malaysia ba taun 2018 kitai bisi 5,572 pengemeran pengelandik jari enggau penyampau nya nambah taun tu ngagai 5,684 iku iya nya nambah 2 peratus,” ku iya.

Ditanya pasal agi 50 peratus asil gumpul chukai dagang temuai ngagai Sarawak, Mohamaddin nerangka, nya udah diberi ngagai nengeri tu ba bulan Mac taun tu nyengkaum nengeri bukai.

Berebak enggau tu, iya arap bendar Sarawak ulih nyapai tagit penyampau penama temuai 5 juta ke nengeri tu nengah Kimpin Nemuai Sarawak 2019 ti chakah dipejalaika.

“Kimpin Taun Nemuai Ke Sarawak 2019 iya nya dikena nyikap napi nuju ‘Visit Malaysia 2020’ ke alai perintah nagit penatai sepenyampau 30 juta iku temuai ke lalu ulih meri asil penatai pemisi dagang temuai sepenyampau RM100 bilion,” ku iya.

Bisi datai, Sapit Ketuai Sekretari (Main Asal) Opis Menteri dagang temuai, seni enggau Main Asal Saraya Arbi, Ketuai Direktor Asil Pengelandik Jari Malaysia Ibrahim Ismail enggau Direktor Kaunsil Pemansang Asil Pengelandik Jari Malaysia Pampang Sarawak, Azran Arip.

Advertisement