SIBU: Bala indu dara Dayak ba nengeri ke agi bujang beumur 18-30 taun dikangau datai ngambi bagi ba Pekit Pemajik Pengerami Main Asal Dayak Borneo (BDCF) 2019 ti deka diatur bepun 21- 24 Julai tu bepalan di Dataran Bandar Sibu Fasa 1.
Pekit tu digaga serimbai enggau Pesta Kebudayaan Borneo (BCF) ke disadang deka digaga ari 18-28 Julai tu bepalan di Dataran Bandar Sibu.
Chairman Komiti pengatur pengawa iya nya Senorita Salleh madah, tetiap iku penyereta meseti bisi peninggi enda kurang ari 5 kaki 2 inchi.
Terang iya agi, pekit tu deka digaga tiga renggat ti bekenaka ngepan bebida iya nya ‘Dress Kontemporari’ kena 21 Julai ungkup renggat keterubah, ngepan asal Bidayuh enggau Orang Ulu (22 Julai) ungkup renggat pengelandik enggau malam final nya ngena Ngepan Iban (24 Julai).
“Miss BDCF 2019 deka mai pulai perais mata duit RM2,500 besereta jumpang, selampai, trofi, hamper enggau bungai.
“Lalu lumur dua deka nerima perais penyampau RM1,500 besereta selampai, trofi dan hamper,” ku iya ditu, kemari.
Nitihka Senorita agi, lumur tiga deka mai pulai perais mata duit RM1,000 besereta selampai, trofi enggau hamper.
“Penyereta ke bulih lumur empat enggau kelima bela mai pulai mata duit RM450 enggau RM350 besereta selampai.
“Lima penyereta ke bukai deka nerima mata duit RM200 ungkup siku-siku ti nyadi perais tepa,” ku iya agi.
Yuran penyereta iya nya penyampau RM30 (enda dipulaika baru) besereta salin kad pengelala enggau gambar pasport.
Haribulan kepenudi penyereta tu iya nya kena 13 Julai tu jam 1 lemai.
Sebarang tanya ke silik tau betanya ngagai Senorita ba lumur 013-8061265, Claudia Dieo (014-6526083) enggau Ambrose John (010-9743948).