KUCHING: Akademi Sarakup Dayak Iban Sarawak (Asadia) terus chakah ngangkatka main asal bansa Dayak ke alai ba setengah taun kedua 2019 bisi 13 kelas belajarka main asal deka diatur.
Nya alai dikena terus negapka main asal bansa, Ketuai Asadia, Mabong Unggang madahka kelas belajarka main asal nya tebuka ngagai mensia mayuh.
Ku iya, kelas nya deka diatur ba Indu Opis SADIA ba Kota Sentosa, palan zumba di Batu 10 Kota Padawan enggau Batu Gong.
“Asadia seruran chakah ngangkat sereta ngerembaika main asal Dayak. Nya kebuah ba setengah taun kedua 2019 tu Asadia deka ngatur kelas belajarka ajat indu Iban, kelas Sape & Belikan, Birejang Beuh & Biroguaong; ajat Iban lelaki; tabuh Iban; gendang pampat; kuntau; kelas kain burie; ngaga tang tauka marik empang; ajat indu Batu Gong; kelas betabuh Batu Gong enggau gendang pampat Batu Gong.
“Semua kelas main asal nya tebuka ngagai mensia mayuh.
“Kami ngarapka mayuh agi orang ulih datai belajarka main asal bansa kitai awak ke main asal kitai ulih tauka majak pegari,” ku Mabong madah ngagai Utusan Borneo.
Dikena nentuka kelas nya mujur sereta ngenataika asil sereta meri penguntung ngagai orang ti belajar, Asadia nyendiaka pengajar ti endang bisi peneleba enggau penau ba main asal ke diajar.
Entara pengajar main asal Asadia iya nya Philip Ami (gendang pampat); Ngo Hawing (sape & belikan, ajat Orang Ulu); John Nuga ( betabuh); Henry Guya (ajat Iban lelaki); Kilau debis (kuntau); Ozie Tungging (Birejang Beuh & Biroguaong); Diman (tangu); Badong (tangu); Elizabeth Tara (kain burie) enggau Shania Xania (ajat indu di Batu Gong).
Sebarang penerang silik bekaul enggau main asal nya tau ditanya ngagai Mabong empu ba lumur 012-6925562.