SINGAPURA: Opis Dagang enggau Dagang Temuai Sarawak (STATOS) di Singapura ti baru ditumbuhka deka nambahka eksport nengeri Sarawak ngagai republik nya ambis nadai 30 peratus ari taun tu nyentuk 2020.
Taun nyin kemari, Sarawak ngeksport barang berega RM1.2 bilion ke Singapura lalu import ari republik nya sepenyampau RM1.6 bilion.
Barang dagang besai ke dipejalaika entara nengeri nya enggau singapura iya nya kereban injin enggau perengka pengangkut, minyak mineral, pelinchir enggau barang pemakai.
Penyampau dagang ti majak ngerembai entara Sarawak enggau Singapura udah dipadahka Kepala Menteri Sarawak Datuk Patinggi Abang Johari Tun Openg maya pengerami pra-bejadi STATOS ba No 80, Robinson Road ditu, kemari.
“Nengah perengkaguna tu ke bisi ba Singapura sereta mega kerejasama entara komuniti dagang Singapura enggau Sarawak...aku pechaya dalam timpuh dua taun kitai ulih nagit urung 30 peratus,” ku iya.
Ke diatu, Abang Johari madahka produk pemakai lebih agi asil betanam betupi udah ngayanka penambah.
Pengerami bejadika STATOS dipelabaka diatur ba bulan Ogos taun tu.
Abang Johari madahka perambu muka STATOS maya Aum Kunsil Nengeri Sarawak ba bulan Mei taun nyin kemari.
STATOS betuaika Chew Chang Guan ti nyadi Ketuai Pemesai Eksekutif.
Nitih ku Abang Johari, Sarawak mega merambu deka muka opis dagang enggau dagang temuai di Pontianak, Indonesia enggau Brunei taun tu.
“Dagang kami enggau Kalimantan mega udah nambah kelebih agi dalam bidang dagang temuai perubat. Enti perintah Indonesia ngesahka deka nyadika Kalimantan nyadi indu menua....kami ulih bekerejasama rat enggau Indonesia,” ku Abang Johari.
Ba renggat dunya, Sarawak ngerikod penyemela dagang positif ba taun 2018 sepenyampau RM51.8 bilion enggau penyampau semua eksport sepenyampau RM97.7 bilion, ngelui ari penyampau import iya nya sepenyampau RM45.9 bilion.
Sarawak ti ngerikod penumbuh ekonomi 4.6 peratus taun nyin kemari, dipelabaka ngerembai 5.0 peratus taun tu. — Bernama