Anda di sini

SDNU megai tanggungpengawa ngempung komuniti Dayak

Advertisement
 Huang (enam ari kiba) ngempat riben ke kelai bejadika Dewan Mayuh Guna SDNU.
NGEMPAT RIBEN: Huang (enam ari kiba) ngempat riben ke kelai bejadika Dewan Mayuh Guna SDNU.

SARIKEI: Serakup Bansa Dayak Sarawak (SDNU) siti gerempung ti beguna bejalaika tanggungpengawa nyerakup bala peranak ke diau ba nengeri tu ti mayuh bengkah pupu raban bansa ti udah nyadi jalai mai pemansang enggau pengelantang kitai.  

Baka rayat Sarawak ari raban bansa ke bukai, Dayak begunaka penyerakup ngambika sada sida didinnga, Kaban Kunsil Nengeri Repok, Dato Sri Huang Tiong Sii nybeut bakanya lebuh ke bejaku ba pengerami “Ngiling Bidai” ti nandaka nutup pengerami Gawai ke diatur SDNU Pampang Sarikei ba Dewan SDNU ditu  Hari Dua bedau lama tu tadi.  

Huang madah, Gabungan Parti Sarawak (GPS)-ti nyadi parti megai perintah nengeri ke diarika mayuh bengkah pupu raban bansa ti beratka sama diri, enggau nya beguna bendar ngagai semua raban bansa nyadaka sada ti kering dikena nentuka semua penanggul enggau penusah sida ngambika ulih diputar lalu diperundingka.  

Ambika chunto, enggau sukung bala rayat, iya enggau bala pengari rayat ke bukai ari Glower Rejang Basin ke dikelala enggau Zon 8 GPS udah mujur bejalaika projek nyambung jalai ari Sungai Pasi ngagai Jalai Tanjung Manis/Sibu ti enggau ungkus RM321 milion,ku  Huang.  

Lebuh penembu nya ba taun 2023, jalai nya deka ngenyenangka bala orang ke bejalaika pengawa betanam nyual asil sida ngagai markit nengah Wap Tanjung Manis, ku iya nambah.  

Nengah iya nyadi kaban kunsil nengeri, perintah GPS udah ngungkupka RM5 milion ba baruh Program Trasfomasyen Menua Pesisir (RTP) kelimpah ari agih belanja projek mit menua pesisir  (MRP), iya madah, sereta nambah nengah agih belanja  RTP iya udah ngenataika mayuh projek ba sekula, kampung enggau rumah panjai.  

Iya gaga ati ketegal Dewan Mayuh Guna SDNU ke beungkus RM200,000 nya siti ari projek ke dipejaklaika nengah agih belanja  RTP iya, ku penerang iya.  

Ba pengerami nya Huang ngemendarka agih belanja RM5,000 ngagai SDNU ngambi bisi dikena sida ngatur aktiviti.  

Sama bisi datai ngulu pengerami nya chairman SDNU pampang Sarikei, Tuai rumah Setia Ungok; komiti pengatur, Kunsilor Egong Undong enggau bala ketuai raban bansa ke bukai.

Advertisement