KUCHING: Sarawak sedia mantu nyendiaka palan pengentap berumah baru ungkup raban bansa ti pindah ari menua pesisir ngiga peluang gawa ke mengeri.
Kepala Menteri, Datuk Patinggi Abang Johari Tun Openg madahka ubah jeman diatu mandangka mengeri besai penuh laban raban bansa kelebih agi bansa Iban ti pindah dibandingka semina 30 peratus bansa nya diau di mengeri ba taun 1963.
Iya madah, pengawa pindah nya nyadi kebuah ekonomi ti minta sida ninggalka menua di menua pesisir.
“Ambika banding di Kuching, statistik mandangka urung 80,000 iku raban bansa Iban netap ditu ketegal peluang gawa ti besai di mengeri.
“Penyampau nya udah tentu deka nambah baru dalam timpuh 10 taun ti deka datai laban ekonomi dunya ti nadai tatak ti mega dikuasa raban biak bansa Iaban,” ku iya lebuh bejaku ba pengerami Gawai Ngiling Bidai 2019 ba sebuah hotel tebilang ditu, malam ensanus.
Pengerami nya ti keterubah iya diatur ba kandang mengeri Kuching diatur begulai Komiti Kereja Ketuai Raban Bansa, Tuai Rumah enggau Serakup Ketuai Raban Bansa dan Tuai Rumah Bansa Iban Pelilih Kuching (PEMAIK).
Berindik ari pekara nya, Abang Johari madahka perintah patut nyendiaka kandang palan berumah ke ulih diempu rayat kelebih agi raban ti kurang penatai pemisi tauka mimit penatai pemisi.
“Nemu pekara tu nyadi, kitai kenyau ari taun nyin kemari udah nurunka penyampau premium tanah ngagai RM2,500 ungkup siti lot, ti lalu nyadika ungkus ngaga projek ngaga rumah murah.
“Tu udah dipejalaika ba kandang endur ti mayuh ditapat enggau mega alai palan pengentap baru. Udah nya ngambika rumah ti lebih murah patut dikemansangka pengempu lalu ungkus pemansang infrastruktur baka ngaga jalai, dinding semin enggau parit konkrit dipelanja perintah Gabungan Parti Sarawak (GPS),” ku iya.
Nitih ku iya, perintah udah numbuhka kompeni Mutiara mortgage and Finance ti meri duit jali ngagai pemeli rumah.
“Reti nya deka nginjau ukai semina ba bank ti besai tang mega ulih ba kompeni wang baka Mutiara Mortgage and Finance tu.
“Nyadi, tu siti ari chara kitai deka ngemansangka kandang palan berumah ke patut disediaka ngagai raban bansa ti pindah ngagai mengeri besai tu,” ku iya.
Entara kandang endur baru ke dikelala ulih endur ngemansangka projek ngaga rumah ungkup sida ti pindah tu ku iya, iya nya di Stapok, Sungai Maong, Segedup enggau kandang endur bukai ti semak enggau Batu Kawa.
“Berindik ari pekara nya, aku deka berunding enggau Sapit Kepala Menteri Datuk Amar Douglas Uggah Embas sereta Temenggung kitai ngambika ulih ngelala endur ke patut dikemansangka baka ti udah dipadahka aku tadi,” ku iya.
Berebak enggau tu, Abang Johari ngenukuka deka mansik isu tanah pendam di mengeri besai baka Kuching enggau Sibu dikena nentuka tanah tauka plot ke bisi nya chukup dikena nampung guna jemah ila.
Bisi ngulu pengerami nya Uggah, Sapit Kepala Menteri Tan Sri Dr James jemut Masing; Menteri Kaunsil Kandang Menua enggau Pengawa Berumah Datuk Prof Dr Sim Kui Hian; Temenggong Iban Bagi Menua Kuching Dato Bernard Aggan Assan ti mega Penyanding Penemu Komiti Pengatur gawai Ngiling Bidai 2019 sereta sekededa menteri enggau menteri muda enggau temuai ke bukai.