MIRI: Gempung Gerempung Pengajar Sarawak (STU) ngansak Opis Menteri Pelajar Malaysia (KPM) ngadaka gred DG56 dikena pengajar ti udah bulih DG54.
Presiden STU Macky Joseph madah, penaluk nya dikena meri peransang ngagai bala pengajar ba tikas nya dikena neruska servis pemujur sida enggau gaji baru nya, nya deka ngangkatka agi motivasyen ngagai bala pengajar biak ngambika sida bisi pengeransing ati ngulihka gred tinggi nya.
Nitih ku iya, bala graduet biak berengkah enggau gred DG41 lalu deka nyapai gred DG54 lebuh umur 49 taun.
“Enggau bisi gred ke tinggi tu reti nya ba umur 49 nyentuk ke 60 enggau gred DG54 iya nya ba dalam timpuh lebih 10 taun, skala nya deka meruan lalu nadai agi gaji niki ti ulih meri sida peransang dikena ngangkatka pemujur servis sida.
“Berebak enggau nya, ketegal bisi gred baru nya, nya ukai semina ulih ngangkatka motivasyen sida enggau ngangkatka prestasi ti mujur, pia mega sida ulih merambu sereta meri penguntung ba dalam pengawa sida,” ku penerang iya.
Macky madah bakanya ba aum pengarang berita udah iya ti nyadi ketuai ba Aum Kaunsil Eksekutif kedua kali STU ditu, bedau lama ke udah.
Iya ngarapka penaluk nya ulih narit opis menteri pelajar ngambi sama ngangkatka sistem pelajar ba ditu.
Ba pekara ke bukai ku Macky, aum nya berundingka isu dikena nyeliahka kelas tambah lebuh maya kemisi sekula.
Nitih ku iya, nya dikena meri awak ngagai bala pengajar enggau nembiak sekula ngasai kemisi sekula lalu enggau jam nya sida begulai enggau bala diri sebilik.
Dulu ari nya, aum nya udah digulu bala komiti kaunsil eksekutif lalu 11 iku pengari ari tetiap bagi opis pelajar ba Sarawak.
Nengah aum nya, mayuh bengkah isu udah dibantai lalu diperundingka ba dalam penaluk ngemanahka sistem pelajar enggau penguntung ungkup nembiak sekula.
Tambah Macky, STU mya siti gerempung pengajar ti besai ba Sarawak lalu bisi lebih 20,000 iku kaban ti berejista naka 31 Mei tu tadi.
STU nya siti pelasar ngemudahka bala kaban iya ngenataika sada sereta pene,u enggau langgur ba dalam penaluk ngenegapka agi pengawa sida tri nyadi pengajar.