Anda di sini

Mayuh meter lekterik diubah di Miri

Advertisement
 Raban pemeresa teknikal Sarawak Energy meresa kereja nyambung wayar sebuah supermarket mini di Jalai Miri-Bintulu.
BERATKA PENGELIKUN: Raban pemeresa teknikal Sarawak Energy meresa kereja nyambung wayar sebuah supermarket mini di Jalai Miri-Bintulu.

KUCHING: Raban pemeresa meter Sarawak Energy di Miri mujur tetemuka mayuh kes meter diubah.

Kes meter nya sebaka enggau ti ditemu maya operasyen ba bulan Mac, ke alai penutup meter palesu dikena ngelalaika komponen lekterik ba meter diubah.

Ulah ti baka nya deka ngeruga bacha meter ti betul lalu ti kena empas, orang ke ngena tauka orang ti disangka semina mayar penyampau bil lekterik ti mimit, taja pan ngena meter ti tinggi.

Empat endur di Miri ditemu ngena chara tu iya nya woksyop injin berat ba estet industri ba sepemanjai Miri Bypass, sebuah supermarket mit ba Jalai Miri-Bintulu enggau dua buah rumah kediri dua ringkat ba Taman Orchid enggau Eco Park 2.

Nitihku pengari ari Sarawak Energy, penutup meter palesu ti bisi ba sekeda premis nya sama enggau kes ti dipansik Komiti Nagang Makai Suap Malaysia (SPRM) enggau SESCO ba Jalai Acacia, Miri ba bulan Ogos taun nyin kemari, ke alai sindiket nya mujur diserungkai.

“Pengelikun pekara ti pemadu dikemeratka kami lalu enchuri lekterik siti ulah jai ti tau ngenusah ke tau balat ngemakal tauka ngujungka pemati.

“Pekara tu tau ngujungka kereban elektrik jai ti ngujungka nyadi penusah angus. Nya alai, penguna dilalau ngambika bejimat lebuh individu ti madahka diri nyendiaka servis ngubah meter ti nyemayaka bil utiliti ti lebih murah,” ku iya dalam penerang berita ensanus.

Semua penutup meter palesu ti dirampas dalam operasyen nya deka dianjung ngagai Unit Pemeresa Elekterik Opis Menteri Utiliti enggau Penguna Menua (SAG) ngambika atur tau dipejalaika.

Penyalah enchuri lekterik tau ditinggang undang-undang enggau ukum  nyentuk RM100,000 tauka ukum jil lima taun tauka kededua nya, enti ditemu salah.

Mensia mayuh enti bisi penerang pasal enchuri lekterik tau terus ngeripot ngagai Sarawak Energy nengah hotline 082-443535 lalu semua penerang deka disimpan sereta dipelalaika.

Sarawak Energy deka terus bejalaika pengawa meresa meter ba serata menua tu nengah kerejasama ejensi ti bekaul baka SPRM, Polis Diraja Malaysia (PDRM) enggau Opis Menteri Utiliti.

Advertisement