SIBU: Parti Bansa Dayak Sarawak Baru (PBDSB) minta perintah nengeri berunding dulu ke pemansang di menua pesisir ari ke deka nyual karan ngagai menua bukai.
Tukang Wang PBDSB Sai Melaka madah, tunga ke Katibas lebih 60 peratus menua nya empai datai karan.
Ku iya, tu nyengkaum menua di Sungai Rejang, Sungai Song, Sungai Iran, Sungai Lajan enggau Sungai Katibas di Song agi mengkang bekenaka injin api enggau api dian.
“Perintah Gabungan Parti Sarawak (GPS) ti megai nengeri tu endang suah didinga ngemeratka pengawa ngemansangka menua pesisir.
“Tang agi mayuh menua ti menua pesisir empai datai karan baka di Katibas,” pia ku iya nengah penerang media, kemari.
Sai madah, PBDSB balat irauka pengidup bansa Dayak ke diau di menua pesisir.
Ku iya, rayat di menua pesisir enda patut dichiping tauka ditinggal tang sama patut ngasaika pengelantang ari pekara nerima pemansang.
“Kitai minta amat perintah nyebelaka tikas sosio-ekonomi enggau pemansang infrastruktur baik nya di kandang mengeri tauka di menua pesisir,” ku iya madah baru.