KUCHING: Naka ke diatu bisi 127 peminta nyadi peranak menua ari baruh Perkara 15A Konstitusyen Perintah Besai udah dikemendarka Opis Menteri Dalam Nengeri (KDN).
Menteri Pengintu Pengelantang Pendiau, Pengelantang Raban Bansa, Orang Indu, Ruang Bilik enggau Pemansang Nembiak Mit, Dato Sri Fatimah Abdullah madahka 127 peminta nya dikenataika nengah Komiti Khas Status Peranak Menua ari baruh Pekara 15A, Konstitusyen Perintah Besai renggat Nengeri Sarawak, ti ditumbuhka ba taun 2016.
Iya madah, kenyau ari komiti nya ditumbuhka nyentuk ke diatu, bisi 23 aum ninting bulan udah mujur diatur, ti berandau sereta bejuraika semua kes peminta nyadi peranak menua ari baruh Pekara 15 nya.
“Nyentuk ke sehari tu, 19 Jun 2019 sepenyampau 723 kes peminta nyadi peranak menua ari baruh Pekara 15A, Konstitusyen Perintah Besai udah dipejuraika ngambika ulih diadu komiti tu.
“Ari 723 peminta ke udah dipejuraika sepenyampau 127 peminta udah nerima surat pemendar lalu pemutus ke bukai deka dipadahka Opis Menteri Dalam Nengeri (KDN) nengah pos terus nuju orang ke minta.
“Sehari tu (kemari) kitai nyuaka surat pemendar peminta nyadi peranak menua ari baruh Pekara 15A ngagai 9 iku semua iya, tang semina tujuh ulih datai ngagai pengerami tu,” ku iya.
Fatimah mansutka pekara nya lebuh bejaku ba pengerami nyerahka surat pemendar peminta nyadi peranak menua ari baruh Pekara 15A, ti diatur begulai enggau KDN ba Wisma Wanita ditu, kemari.
Entara semilan penerima ke bisi datai ti beumur 4 ngagai 18 taun iya nya Tnay See Chen, Elven Lai Yong Le, Sheila Sii Tong, Lim Jia Jia, Wong Yung Foong enggau dua iku diri menyadi Kueh Xin Ying enggau Kueh Jun Jie.
Bejaku baru iya madahka tuju komiti nya ditumbuhka, dikena mantu raban peminta baka ari pun deka nentuka pom peminta diisi magang enggau betul ngambika ulih diterima KDN.
“Kami (komiti) enda ulih meri pemendar ngagai peminta nya, tang nentuka peminta nya dikemendarka, prerogatif KDN.
“Dikena mutarka isu peranak menua tu, aku minta kerejasama iya nya maya ngenataika peminta, pom patut diisi magang sereta dokumen sukung baka ti dipinta JPN.
“Aku ngarapka semua rayat ti bulih peranak menua ti berejista tu berasai andal ati ngena mayuh pekara ti disediaka perintah sereta ngasaika pengidup ti menua,” ku iya ti nyadi chairman komiti nya.
Peminta nyadi peranak menua ari baruh Pekara 15A Konstitusyen Perintah Besai, iya nya dikena ngulihka nyadi peranak menua Malaysia ti berejista ungkup umur individu ari baruh umur 21 taun, ketegal pekara khas.
Nitih ku Fatimah, peminta Pekara 15A nya nyadi kebuah proses pengerejista pengada anak enda diaduka penyaga, baka maya ngerejista apai indai iru mantaika dokumen pengada bula ti ngujungka Opis Pengerejista Bansa (JPN) ulih dikemula lalu ngerejista nya apai indai endar.
“Bekaul kes tu JPN udah ngelalau apai indai iru nya ngiga nyentuk ke ulih nemu apai indai endar anak mit sereta ngerejista penyaga nitihka prosedur ti bisi atur.
“Peminta Pekara 15A tu nyadi mega ketegal anak nya ada sebedau apai indai nya jadi laki bini. Dalam ke baka tu apai endar nya peranak menua Malaysia, indai endar peranak menua luar, nya alai status anak deka nitihka peranak menua indai iya.
“Laki bini ti enda enda ngerejista diri nyadi melaki bini mega kebuah kes peminta Pekara 15A Konstitusyen Perintah Besai nyadi,” ku iya.
Sama bisi ngulu pengerami nya kemari, Menteri Muda Pengelantang Pendiau Raban Bansa Datuk Francis Harden Hollis; Sekretari Seksyen, Bagi Pengerejiasta Bansa enggau Gerempung KDN Zamari Mohd Ramli; Pemangku Sekretari Mendam Opis Menteri Pengintu Pengelantang Pendiau Pengelantang Raban Bansa, Orang Indu, Ruang Bilik enggau Pemansang Nembiak Mit Caroline Joseph sereta Direktor Opis Indu enggau Ruang Bilik Sarawak (JWKS) Noriah Ahmad enggau ke bukai.