SRI AMAN: Bidang pelajar pelasar pemansang enggau pemujur ke pemadu beguna ungkup sesebuah menua, ku Kaban Kunsil Nengeri (ADUN) Lingga, Simoi Peri.
Iya madah, ba jeman ke diatu, besemekih dalam pengidup begunaka tetiap peranak menua ti bisi tikas pelajar ti tinggi ngambika setipak enggau piawai global lalu enggau nya ulih besemekih bediri sama tinggi enggau duduk sama baruh sama enggau komuniti luar tauka komuniti global.
“Berindik enggau nya, dikena nentuka bala anak kitai, komuniti kitai ke ba tikas global nya, inovasyen enggau pemansang pelajar semampai dikemerat ari taun ke taun,” ku iya.
Iya madah baka nya lebuh ke bejaku ba pengawa bejadi pengerami Gawai Raya ke diatur Sekula Primari (SK) Sri Aman ba balai sekula nya ditu pagi kemari.
Ku iya, penyulut enggau pemujur ke dijapai bala nembiak sekula ukai utai ke datai kediri empu ti enda enggau ajar sereta iring bala pengajar. Penaluk ati enggau pengeransing bala pengajar, enda patut disebut kitai nyadi siti bidang pengawa aja laban pengawa sida ngelui ari nya.
“Ba kitai orang luar ke diau ba kandang sekula tauka api indai, pengajar iya nya orang ke meri penemu, tang kebendar iya, pengawa sida ukai semina ngajar, sida mega ti ngiri bala anak enggau penenu ke bukai baka bebakih, bekomunikasyen, ngiri penemu sentang reti enggau gaya idup dalam komuniti ngambika bala anak ulih idup lebuh ke pansut ari sekula jemah ila,” ku iya.
Berebak enggau nya ku iya, penaluk bala pengajar enggau sekula tu mega enda nyadi enti bala apai indai semina ngelempaika tanggungpengawa ngajar bala anak ngagai pengajar aja laban penemu, pengelandik enggau peneleba ti diulih sida ba sekula begunaka penegap ari apai indai enggau bilik ruang sida.
“Kebendar nya, bala apai indai beempu tanggungpengawa kediri empu dalam ngajar bala anak enggau nentuka anak sida belajar lebuh ba rumah, lalu beratika anak chukup perengka dikena belajar, likun, lantang ba dalam semua aspek pengidup.
“Bala anak ti chukup intu sereta barang ke dikena chukup ukai semina teulihkapemujur ba dalam pengidup sida tang mega sida enda mudah nitihka ulah enggau pengawa ti enda bepengerai baka dadah, gam, lumba enda beradat enggau mayuh bengkah penyalah rama ke bukai,” ku tambah iya.
Bela bisi datai ngulu pengerami nya, Kepela Pengajar sekula, Rogayah Rabaier, Bala Pengajar Kanan, Pemancha Mas Shamsiah Maslem sereta bala pengajar enggau bala pengereja pengawa sekula nya.