KUCHING: Vernon Aji Kedit ti kala nyadi Ketuai Pemadah Parti Keadilan Rakyat (PKR) Nengeri madahka iya tau ngemansutka penerang ti dikumbai iya amat sereta enda ibuh berunding tauka betanya enggau orang bukai.
Iya mansutka pekara nya ba mua Akim Kort Tinggi Ravithran Paramaguru lebuh ditanya balas luyar defendan, Sim Hui Chuang, kemari.
Sapit Kepala Menteri, Datuk Amar Douglas Uggah Embas nyaman Vernon bekaul enggau dawa (Vernon) ti madah iya ‘penipu’ enggau ‘pengkhianat’ nengah siti penerang ti dianjung ngagai raban WhatsApp PKR State Media kena 12 Julai 2018.
“Aku ti nyadi ketuai pemadah, aku bisi tanggungpengawa ngeluarka penerang ti ba runding aku nya amat.
“Aku ulih ngemansutka penerang sereta enda ibuh berunding tauka betanya ngagai orang bukai.
“Bisi kes ke alai bepelasarka pangku pengawa aku, aku tau enda ibuh begunaka pemendar,” ku iya nyaut luyar Uggah, Sim Hui Chuang.
Vernon bejaku baru madahka siti ari pengawa iya nya nyadung penerang.
Vernon madahka iya negi sereta ngetanka hak rayat Sarawak tang iya napi pemar dalam kes tu.
“Penerang ti aku pansutka suba iya nya amat sereta aku pechaya pengamat nya ba sepiak ngagai aku,” ku iya.
Ku Vernon bejaku baru, penerang ti dipansutka iya taun nyin kemari iya nya dikena nimbal ngagai artikel berita dalam portal berita Dayak Daily.
Vernon mega madahka raban WhatsApp PKR State Media iya nya chara dikena meri penerang sereya ti dikena ngaul peranak Sarawak.
Nitihku Vernon iya udah ngetu ari mangku pengawa nyadi Ketuai Pemadah PKR Sarawak, bulan nyin tadi.
Sama bisi datai ngagai Kort Tinggi kemari, Kaban Kunsil Nengeri (ADUN) Bukit Goram Jefferson Jamit, Ex-Sapit Kepala Menteri Tan Sri Alfred Jabu Numpang sereta sekretari politik datai meri sukung ngagai Uggah.