Anda di sini

Lapan sampel ditukuka positif rabies: Dr Adrian

Advertisement

KUCHING: Bisi lapan ari 20 sampel ke diterima Opis Servis Veterinar Sarawak disahka positif rabies, naka minggu keterubah Jun taun tu.

Lapan sampel positif nya ari Kampung Ranchan Bunuk, Serian; Kampung Sumpas, Balai Ringin, Serian; Bayang Estate Off, Lurung Wan Alwi, Kuching; Blok 3, Jalai Muhibbah, Kuching; Laman Kim San, Jalai Bampfylde, Kuching; Lurung Bowood 2A1, Taman Bowood, Kuching; Jalai Chawan, Kuching enggau Jalai Semeba, Batu 5, Jalai Penrissen, Kuching.

Direktor Veterinar Sarawak, Dr Adrian Susin Ambud madah, mayuh kes positif baru diatu enda nerima tuchuk vaksin rabies.

“Sampel nya digumpul ari bagi menua Kuching, Bau enggau Serian ke alai semua kes positif ke dalam radius 10 kilometer ba kandang endur rabies ke bisi berampit,” ku iya nengah siti penerang media kemari.

Berindik enggau nya, Veterinar Sarawak ngansak orang mayuh ngambika meri tuchuk vaksin rabies ngagai semua ukui sida dalam nyaga jelu tupi enggau ruang bilik diri empu.

“Tuchuk patut di beri ngagai ukui dikena munaska penyakit tu. Nyadi penyalah ari baruh Seksyen 40, Ordinan Pengerai Mensia Mayuh Veterinar 1999 enti orang ke ngempu nadai meri vaksinasyen ngagai ukui sida.

“Sesapa ke ngempu tauka orang ti ngempu tanggungpengawa nupi ukui puntan enggau kebuah ke patut enda nitihka barang bagi perintah enggau atur ke digaga tauka diberi ari baruh subseksyen (1) tauka (3) nya siti penyalah, lalu deka diukum enda ngelui ari RM2,500,” ku penerang iya.

Berindik enggau nya, iya minta mensia mayuh bekerejasama lalu nentuka ukui tupi sida diberi vaksin rabies.

Ku iya, kimpin vaksin rabies ari pintu ke pintu deka dipejalaika maya renggat 4 operasyen rabies di Serian enggau Simunjan berengkah ari 20 nyentuk ke 25 Jun tu.

“Ngagai sida ti enda ulih nganjung ukii sida ngambika ditiuchuk vaksin rabies maya operasyen nya, kita tau mai ngagai Opis Veterinar Pelilih Menua ke besemak maya jam kereja,” ku iya.

Berebak enggau nya mega iya madah, Veterinar Sarawak deka terus bejalaika  program munaska rabies nyengkaum vaksinasyen chara besai, kimpin ngiri penemu, nyaga enggau matau gaya penyakit tu di Sarawak.

“Naka ke diatu bisi 119,873 ukui udah dituchuk vaksin rabies kenyau ari taun 2017,” ku iya.

Advertisement