KANOWIT: Opis Muzium Sarawak benung sereta merambu ngangkatkamanah sekeda endur besejarah di Sarawak nyengkaum kubu ngambika dipasuk ke dalam UNESCO World Heritage Sites.
Pemangku direktor opis tu Suria Bujang madah, nengeri tu bisi lebih kurang 12 iti kubu nyengkaum Kubu Margherita di Kuching, Kubu Alice (Sri Aman), Kubu Lili (Betong) enggau Kubu Emma (Kanowit).
“Kelimpah ari nya diatu kitai benung ngangkatkamanah Gua Niah ngambika dipasuk ke dalam Unesco World Heritage Sites, kitai mega merambu deka ngangkatkamanah kubu ba nengeri tu,” pia ku iya madah.
Iya mantaika pekara nya maya Woksyop Program Kaul Mensia Mayuh Ba Pengawa Ngintu, Nyaga Sereta Ngemanahka Kubu Emma di Kanowit, kemari.
Bekaul enggau Gua Niah, ku iya, pengawa nya begunaka timpuh dalam kandang tiga ngagai empat taun.
Suria madah, enti udah mujur dirintai ari baruh UNESCO World Heritage Sites, palan besejarah nya deka ditemu genap mensia mayuh di serata dunya kelebih agi sida ti rinduka sejarah lama.
Pekara tu ku iya, tau bendar nyungkak penatai pemisi menua seraya ti nyaga palan sejarah.
“Udah ditemu kitai baka ba George Town di Pulau Pinang enggau Melaka, penyampau temuai menua bukai endang mayuh nemuai kia laban udah dirintai ari baruh Unesco World Heritage Sites,” ku iya madah baru.
Kelimpah ari nya, Suria madahka di Miri dua iti endur sejarah iya nya Canada Hill enggau Tanjung Lobang deka ditukuka nyadi palan sejarah.
Iya madah, sida udah minta Opis Tanah enggau Survei ngelawa palan nya.
Projek Ngintu, Nyaga Sereta Ngemanahka Kubu Emma siti projek ari baruh Langgur Malaysia Ke-11 ti ngena ungkus RM5 juta.
Ku Suria, projek nya digaga berengkah ari 23 Jun 2018 lalu dilanggur tembu Disember 2019.
Naka bulan Mei 2019 ku iya, projek nya udah digaga 60.58 peratus.
“Kubu tu siti ari empat kubu ke benung digaga ba projek ke sebaka.
“Kubu bukai iya nya Kubu Lili (Betong), Kubu Brooke (Julau) enggau Kubu Hose (Marudi).
“Kelimpah ari nya, projek ke sebaka mega bela diperambu digaga ba Kubu Slyvia di Kapit,” ku iya seraya madah enti udah tembu ila Kubu Emma mega deka diangkat nyadi Muzium Pesaka Kanowit.
Program sehari nya ti digulu 150 iku penyereta nya diatur Opis Muzium Sarawak begulai enggau Opis Kereja Raya Sarawak sereta Opis Pelilih Kanowit ti ngembuan tuju deka mantaika sejarah enggau pengawa ngemanah Kubu Emma ngagai mensia mayuh di Kanowit.
Kubu Emma siti ari pesaka sejarah ke digaga jeman pegai Rajah Brooke.
Ba pun taun 1849, kubu keterubah digaga di Kanowit ngena buluh enggau atap mulung tang anchur ujung taun nya sebedau kena bulan Ogos 1851, siti agi kubu digaga tebing Sungai Rejang.
Kubu nya tegap agi laban digaga ngena kayu tebelian sereta diberi nama Kubu Kanowit.
Tang ba taun 1859 Kubu Kanowit ditunu lalu kubu digaga baru ba taba ke sebaka dalam taun 1860.
Kubu baru nya digaga ke diberi nama Kubu Emma ngangkatka nama menyadi James Brooke, iya nya Emily Brooke.