MIRI: Nyadi pengingat sereta sejarah ngintu pengerami Gawai Dayak 2019 peranak ke diau ba Rumah Bangkong Ensawang 1, Skim Skrang ke taun tu, pengudah sida nerima agih belanja sepenyampau RM35,000 ari perintah besai dikena ngaga manah agi rumah panjai sida.
Berebak enggau nya, Komiti Pemansang enggau Genturung Pendiau (JKKK) enggau Biro Indu bela nerima agih belanja RM10,000 enggau RM5,000.
Agih belanja nya disua Kaban Parlimen (MP) Lubok Antu Jugah Muyang ngagai tuai rumah Kunsilor Bangkong Maweng lebuh pengerami Ngiling Bidai ke diatur ba rumah panjai nya Hari Enam bedau lama ke udah.
Ba dalam jaku iya, Jugah meri terima kasih ngagai bala peranak ke diau ba rumah panjai nya ketegal penaluk ngatur pengerami nya lalu pia mega ulih dikena nanggam rat kaul entara sida ke diau dia.
“Pengerami ti bakatu ulih ngerapit ke tanggam kaul sama diri, nadai ngira jalai pengarap enggau penatai pendiau sida.
“Nya alai, aku meri pengaga ati ngagai bala komiti ti ngatur sereta ngmabi inisiatif ngaga pengerami tu lalu aku ngarap sida ulih nerus ke pengerami tuba taun-taun ti deka datai nangkan ke tu,” ku Jugah.
Iya mega ngelalau semua orang ke diau ba rumah panjai nya ngambika semampai berakup lalu enggau nya program pemansang deka bejalai enggau lanchar ba kandang menua sida.
“Sitak Parlimen Lubok Antu begunaka mayuh agih belanja enggau bantu ari perintah besai bejalaika mayuh projek infrastruktur enggau pemansang ti deka mantu ngangkatka tikas pemanah pengidup rayat Lubuk Antu.
“Enti semua orang ulih begulai sereta meri sukung ngagai perintah besai Pakatan Harapan, nya deka meri penyenang agi ngagai perintah ngaga perambu enggau bejalaika projek keguna rayat ba ditu,” ku iya.
Sama bisi datai ngulu pengerami Ngiling Bidai iya nya Pemesai Opis Pelajar Lubok Antu Jim Andrew Janggi, Pemesai Opis Pengerara Api enggau Penyah Penusah (Bomba) Gemong Batu enggau bala tuai rumah ari 13 buah rumah panjai ke berimbai pendiau ba dia.