MIRI: Peranak ba genturung pendiau patut nyaga perengka guna mensia mayuh ti udah disediaka perintah nengeri ke diguna ungkup semua.
Kaban Kunsil Nengeri (ADUN) Lambir, Ripin Lamat madah perintah nengeri mayuh meri projek ungkup rayat nengah Program Transformasyen Menua Pesisir (RTP).
“Perengka guna baka rumah sembiang, chapel, balai raya tauka balai mayuhguna patut dijaga begulai ngambika nya ulih meri penguntung ngagai mensia mayuh,” ku iya ba pengerami Bejadi Chapel St. Peter & Paul di Upper Bakam Miri dan Dewan Kampung Nelayan Kuala Bakam, Miri’, pagi kemari.
Ripin ambi chunto, bisi balai mayuhguna ke baru siap di Taman Tunku udah jai kurang ari timpuh sebulan ketegal pengawa vandalisme.
“Aku andal ati ngarap peranak genturung pendiau tauka Komiti Pemansang enggau Pengelikun Genturung Pendiau (JKKK) nyaga semua perengka guna RTP ti udah disediaka perintah,” ku iya.
Nitih ku iya, projek ke diguna peranak menua nya sebengkah ari bukti perintah nengeri siru enggau peminta rayat khas iya ba menua pesisir.
“Mensia mayuh patut begulai nyaga fasilitisyen nya enggau manah baka ke semua sida ti ngempu nya lalu nyaga pemeresi nya,” ku iya.
Kededua projek RTP ba kandang menua Bakam nya bela siap ba timpuh setaun kenyau iya dikemendarka perintah taun tu tadi.
Ripin mega ngemendarka penambah begunan mayuhguna kelas ba kandang endur Chapel St. Peter & Paul sereta ‘awning’ kena nyeliahka tempias ujan.
Berebak enggau nya, madahka geran penyampau RM3,000 ngagai JKKK Kampung Nelayan Kuala Bakam ungkup pengawa akiviti.
Sama bela datai iya nya ketuai jomuniti ke mega Chairman JKKK Kampung Nelayan Bakam Okong Sulip, Chairman Chapel St. Peter & Paul, Albert Mawi, Penghulu sitak Bakam, Adam Bujang sereta bala ketuai raban bansa.