KUCHING: Perintah nengeri deka ngangkatmanah Kort Bumiputera Sarawak ngambika sama enggau Kort Sivil sereta Kort Syariah.
Pekara nya disebut Kepala Menteri Datuk Patinggi Abang Johari Tun Openg ti madah, chara nya beguna bendar dikena ngenegapka guna sereta bidang kuasa Kort Bumiputera Sarawak ba dalam mutarka isu ti bekait enggau adat asal rayat ti mayuh bengkah pupou raban bansa nyengkaum isu ti mungkur tanah hak adat asal Bumiputera (NCR) ba nengeri tu.
Tambah iya, dikena tuju nya, iya minta Sapit Kepala Menteri Datuk Amar Douglas Uggah Embas nyadi ketuai sereta numbuh siti komiti dikena mansik enggau ngangkat manah agi Kort Bumiputera Sarawak ngambika sama enggau Kort Sivil sereta Syariah.
“Bisi guna kitai ngangkatmanah Kort Bumiputera tu laban aku arap nya deka mantu kitai mutarka penanggul ke bekait enggau adat asal nyengkaum tanah NCR nengah undang-undang adat ke bisi ba nengeri tu,” ku iya.
Iya nyebut bakanya lebuh ke bejaku ba pengerami bejadi pengerami Gawai Dayak Renggat Nengeri 2019 ti ngena rambai jaku raban bansa Bidayuh ‘Indi Awang Indi Asung’ ba sebengkah hotel ti tebiang ba ditu malam kemari.
Berebak enggau nya, Abang Johari mega ngarapka komiti ke ditumbuhka ila ulih ngatur struktur Kort Bumiputera Sarawak ulih ditegapka nitih ke adat enggau tradisyen ke bisi ba ditu.
Kelimpah nya, iya mega ngansak raban bansa Dayak ngambi bagi ba dalam pengawa betanam betupi moden dineka nambah penatai pemisi lalu nyungkak ekonomi orang ke diau ba menua pesisir.
Ku iya, perintah Sarawak amai komited ba dalam mantu bala orang ke betanam betupi ba penaluk sida ti ngaduka betanam netupi moden ba nengeri tu.
Iya madah agi, perintah nengeri deka muka Opis Dagang rasmi ba Singapura kena minggu ti deka datai dikena ngerembaika agi makit asil betanam nengeri tu ngagai menua nya.
“Pia mega, kitai mega berati enggau berat ngagai pemansang infrastruktur ba kandang menua pesisir nengah agih belanja ti besai ke udah dikemendarka ba Belanja Nengeri 2019 ke udah lalu.
“Tu penaluk kitai ba dalam nentuka rayat menua pesisir tu ngasai pemansang ti manah agi,” ku iya.
Sama bisi datai nyempulang iya ngagai pengerami nya Datin Patinggi Datuk Amar Juma’ani Tuanku Bujang, Uggah, Menteri Pelajar, Sains enggau Pansik Teknologi Dato Sri Michael Manyin Jawong sereta temuai dipebasa ke bukai.