Anda di sini

Video ti dikerembai nya ‘politik kamah’: Zuraida

ZURAIDA
ZURAIDA

KUCHING: Mandal Presiden Parti Keadilan Rakyat (PKR), Zuraida Kamaruddin madahka diri berasai asa sereta sinu pasal isu pengerembai video kamah (video seks) ti bekaul enggau pemesai tinggi parti sereta nyadi perati diatu.

Zuraida nengah penerang berita iya kemari, madahka, enggau isu ti baka nya ditambah mega nyerumba rayat enggau perintah benung bebendar deka mutar tauka ngangkatka pemanah gaya ekonomi menua.

“Aku deka berasai asa sereta sinu ngagai klip video kamah ti bekaul enggau siku pemesai tinggi dalam parti sereta perintah ti dikerembaika berengkah kemari ( Hari Dua).

“Maya rayat enggau perintah benung bebendar deka ngangkatka pemanah gaya ekonomi menua enggau ngangkatka tikas idup rayat, main politik kamah tu chukup enda ngelantangka sereta nanggul pengawa  numbuhka Malaysia Baru,” ku iya.

Nambahka nya Menteri Pengawa Berumah enggau Kaunsil Kandang Menua nya nyemetak madahka diri pechaya iya ngagai personaliti pemesai ti dipetenah nya enggau nadai bagi.

“Pengarap aku tu bepelasarka usul orang ti nuduh ti amat ngasuh saru sereta ditemu ngembuan kaul manah enggau penyakal.

Sebarang pekat politik dikena munuh karakter ti baka tu patut diketuka tekala nya lalu aku amat ngarapka opis ke  bekaul ulih bejalaika pansik sereta mai orang ke salah ngambika dipechara,” ku iya.

Kelimpah ari nya, Kaban Kaunsil Ketuai Pusat PKR, Zakaria Abdul Hamid madahka iya arap endar semua tuduh  ngagai menteri kabinet nya petenah jai, kamah enggau pekat politik dikena ngelabuhka iya.

“Pekat politik petenah ti ditandu baka ti digaga ngagai Datuk Seri Anwar Ibrahim, 20 taun ke udah.

“Pengawa ngerembaika video ke baru tu ngena chara teknologi ke pemadu baru nukar imej chukup enda manah dipeda lalu ulah ke jai nya dikena bejai Perintah Pakatan Harapan (PH) sereta PKR,” ku iya.

Berindik ari pekara nya PKR nulak enggau bebendar ulah politik kamah sereta keji ti baka nya enggau meransang rayat Malaysia ngambika beserakup ngelaban sereta nulak ulah politik kamah.

Ku iya, nama ti patut dipejalaika iya nya besemekih ngena chara manah ti mantaika idealisme diri empu.

“Ngagai menteri kabinet ke dituduh sereta sida sebilik, ngarapka kering sereta liat ati napi penguji sereta pemar tu.

“Pekara ti betul deka pansut. Sampi kami ngiring pengawa dikereja nuan Yang Berhormat ngambika diberi pengeliat ati, pengering enggau penyulut,” ku Zakaria.