Anda di sini

Tinda jalai ti nyambung Sibu Jaya enggau Lanang udah diberi ngagai kunteriktor

 Abang Johari (tiga ari kiba) begulai enggau Juma’ani (tiga ari kanan) lebuh ngabang pengerami Hari Raya ba rumah Temenggung Datuk Wan Hamid Edruce (kanan) ba Jalai Jasmin.
NGABANG RAYA: Abang Johari (tiga ari kiba) begulai enggau Juma’ani (tiga ari kanan) lebuh ngabang pengerami Hari Raya ba rumah Temenggung Datuk Wan Hamid Edruce (kanan) ba Jalai Jasmin.

SIBU: Tinda ungkup projek ngaga jalai semanjai enam kilometer ti nyambung kandang menua Sibu Jaya-Lanang udah diberi ngagai kunteriktor.

Kepala Menteri Datuk Patinggi Abang Johari Tun Abang Openg madah, pengawa ti bejalaika projek nya deka berengkah enda lama agi.

“Projek nya dipelabaka tembu dalam timpuh dua taun setengah,” ku iya nerang lebuh ke ditemu media udah ke ngabang pengerami Hari Raya Aidilfitri ba rumah Menteri Muda Pelajar enggau Pemansik Dr Annuar Rapaee ba Jalai Kangkong ditu kemari.

Berebak enggau nya, ba pekara bukai, Abang Johari madah, selebih diberi ngagai ruang bilik mansa penusah angus ba Kampung Datu/Kampung Hilir ungkup projek rumah ulih diempu ba Kemunyang ditu.

“Tu dikena meri sida bisi rumah diri empu enggau perengkaguna infratruktur nyengkaum sistem parit sereta jalai alun ti disediaka perintah.

“Projek tu dipelaba siap ba dalam timpuh dua taun,” ku iya.

Abang Johari madah, bisi 813 lot disediaka ba baruh pengawa ngaga projek ti deka digaga berenggat-renggat.

Projek ‘Perumahan Mampu Milik’ ba Kemuyang deka meri penguntung ngagai lebih 3,000 iku orang ke diau ba kandnag menua Sibu.

Dulu ari nya Abang Johari disempulang bini iya Datin Patinggi Datuk Amar Juma’ani Tuanku Bujang bisi ngabang pengerami Hari Raya ngagai rumah Temenggung Datuk Wan Hamid Edruce ba Jalai Jasmin.

Sama nyempulang iya, Menteri Muda Jalai  Pesisir Datuk Julaihi Narawi, Menteri Muda ba Opis Kepala Menteri (Undang-Undang, Kaul Sarawak enggau Perintah Besai enggau Matau Projek) Sharifah Hasidah Sayeed Aman Ghazali enggau Kaban Parlimen Petra Jaya Datuk Seri Fadillah Yusof.

Bala sida iya udah nya neruska pengawa ngabang pengerami Hari Raya ngagai rumah ex- Kaban Parlimen Igan Datuk Wahab Dolah ba Kampung Nangka.