KUCHING: Operasyen ngelaban rabies renggat Ke-4 deka dipejalaika ba Pelilih Menua Serian enggau Simunjan, berengkah 20 ngagai 25 Jun ke deka datai tu.
Sapit Kepala Menteri, Datuk Amar Douglas Uggah Embas madah, naka ke diatu igi penyakit rabies tauka disebut ‘penusah ngenyit renggat 2’ di nengeri tu, ke alai igi penyakit nya udah munuh 17 nyawa, kenyau Mei 2017.
Uggah madahka bisi tiga fasa operasyen udah dipejalaika naka ke diatu ti nyengkaum ba Pelilih Menua Lundu sereta Bau, Padawan sereta Samarahan enggau Kuching.
Ku iya, nengah operasyen ke udah dipejalaika, kitai udah mujur mindahka 5,867 iku ukui lelang enggau 38 iku mayau.
“Aku pechaya kitai udah nyapai objektif kitai taja pan betapi enggau pengelemi sereta pemar.
“Aku ngarapka operasyen ke deka datai tu ila deka dipejalaika enggau lebih teatur sereta ngasi,” ku iya mansutka pekara nya lebuh nyadi chairman aum JPBNS pasal rabies ti diatur ba Bilik Operasyen Nengeri ditu, kemari.
Bejaku baru iya madah, ke rikod, ba Pelilih Menua Serian operasyen mungkur 257 genturung pendiau ti mungkur 18,837 ruang bilik.
“Dianggarka bisi 7,817 iku ukui ke diempu 3,900 iku orang enggau bisi 552 iku ukui lelang.
“Naka ke diatu ba taun tu, bisi 25 iku ukui udah dituchuk vaksin,” ku iya ti mega chairman JPBNS.
Taun nyin kemari ku iya, bisi 9,457 iku ukui udah dituchuk vaksin nyengkaum ba pelilih menua Tebedu.
Lalu ba pelilih menua Simunjan, operasyen tu deka dipejalaika ba 144 genturung pendiau enggau 12 ladang sawit.
“Pelilih menua nya dipadahka bisi urung 104 iku ukui lelang lalu 257 ukui bukai ke bedau dituchuk vaksin,” ku iya.
Lebuh ti ngenang pasal orang ti dipelabaka dirampit igi penyakit nya ke diatu agi diperubat ba Sepital Besai Sarawak (HUS).
“Kitai tusah ati laban kes positif mensia agi nyadi.
“Kitai enda tau enda sereta deka bejalaika atur ke terit kelebih agi bekaul enggau operasyen ngelaban rabies ti benung nyadi tauka jemah ila,” ku iya.
Berebak enggau tu Uggah madahka diri tusah ati taja pan mayuh lalau sentang chara ngubat diri empu nyema kena ketup ukui nengah surat kabar, media rama, surat pemadah enggau poster, tang agi bisi sekeda orang enda beratka pasal pekara perubat nya.
Ku iya chara ngubat nya mudah amat, keterubah, tuchi dulu bekau ti kena ketup tauka keramak nya ngena sabun ngena ai beresi ti anyut pengelama 10 ngagai 15 minit.
Udah nya, enggau lengkas nganjung diri berubat ke sepital tauka klinik ti pemadu semak, ku iya.
Sama bisi datai enggau baum, Sapit Sekretari Perintah Nengeri Datuk Ik Pahon, Direktor Unit Pengelikun enggau Penerit Adat Nengeri Dato Dr Chai Kin Chung; Direktor Opis Servis Veterinar Nengeri, Dr. Adrian Susin Ambud enggau Superintenden Ang Siaw Aun ti ngarika Pesuruhjaya Polis Negeri.