Anda di sini

MBM seruran ngelaluka program ngelakuka pemakai asal, antarabansa

 (bediri baris belakang, enam ari kanan) Yong, Yii, Lin sereta nala bukai begambar begulai enggau bala temuai ari Taiwan udah pengerami makai malam ditu, Hari Dua ke udah lalu.
NYADIKA ALBUM: (bediri baris belakang, enam ari kanan) Yong, Yii, Lin sereta nala bukai begambar begulai enggau bala temuai ari Taiwan udah pengerami makai malam ditu, Hari Dua ke udah lalu.

MIRI: Opis Kaunsil Mengeri Miri (MBM) semampai ngelalu sereta nyukung atur pengawa ngelakuka pemakai sekalika pemakai asal tauka antarabansa ba dikena narit mayuh agi temuai datai ngagai bandar raya Miri.

Datuk Bandar MBM Adam Yii madah, Miri begunaka mayuh macham produk dagang temuai ti ulih meri peneleba ti bebida ngagai bala temuai ti datai nemuai.

“Ari suku dagang temuai, kitai agi baru ba dalam industri dagang teumai banding ba tempat bukai lalu kitai diatu agi ba tikas ngemansangka produk dagang temuai.

“Entara siti produk ti ulih mantu ngangkatka industri dagang temuai iya nya pemakai.

“Ke alau, nya mega entara produk ti ulih nyadi ke tambah ngagai kitai ba ditu laban kitai ba ditu bisi mayuh macham bengkah pemakai asal ti ulih dipilih bala temuai,” ku iya.

Yii bejaku bakanya ba pengerami makai malam dikena ngelaluka 30 iku temuai ari  Taiwan ba Resturin Boulevard ditu Hari Dua tu kemari.

Delegasyen nya diarika Taipei Resturin enggau Beverage Workers Union.

“Aku mega ngena peluang tu ngelaluka bala chef ke tebilang ari Taiwan ke Miri. China Miri, baka mayuh orang China ba  menua luar nya ari selatan China lalu pemakai sida bepelasarka Selatan baka pemakai Fijian enggau Kantonis.

“Taja pia, aku beratika ke alai peneka raban bansa mega berubah, lalu mayuh ti berengkah rindu enggau pemakai China.

“Nya alai, mayuh resturin ti nyendiaka utai sumai enggau pemakai China tebilang jam kediatu ti nyendiaka Sichuan enggau timur laut,” ku iya.

Berebak enggau nya tambah Yii, nya ngarapka chef tauka tukang masak menua tu enggau tebilang ari luar ulih bekunsi peneleba sida enggau industri kulinari sereta pemakai.

Datai sama iya nya Chairman Tukang Masak Miri Yong Wan Khiong enggau Direktor Taipei Resturin enggau Beverage Workers Union Jacky Lin.