SRI AMAN: Menteri Muda Pengelantang Komuniti Sarawak, Datuk Francis Harden Hollis ngelalau bala apai indai ba nengeri tu ngambi enda manggaika tanggungpengawa ngajar bala anak sida ngagai bala pengajar enggau sekula aja.
Nitih ku iya, apai indai patut bisi tanggungpengawa ti sama baka pengajar ba sekula ngajar bala anak sida lebuh anak sida diau ba luar sekula udah tembu jam belajar.
“Apai indai enda patut nyerahka tanggungpengawa ngajar bala anak sida ngagai pengajar aja tang sida mega patut bekerejasama rat enggau sekula sereta bala pengajar nentuka pelajar bala nembiak mujur,” ku iya.
Francis ti mega Kaban Kunsil Nengeri Simanggang bejaku munyi nya lebuh ke bejadi Pekit Betanda Sekula Primari China Renggat Nengeri ke diatur Gerempung Sekula Primari China Bagi Menua Sri Aman enggau Betong ba Dewan Suarah, Sri Aman ditu.
Ku iya, apai indai mega patut suah agi ngenataika diri empu ke sekula bala anak kitai lalu betanya sentang ikas pelajar bala anak sida lalu enti patut, apai indai mega patut berunding enggau bala ba sekula sentang semua penanggul ti ditapi bala anak kita.
“Anang sesekali kitai enda beratka pelajar bala anak kitai, laban pelajar tu ila nyadi kunchi ngagai sida ngulihka pemujur sida empu jemah ila.
“Kita enda patut manggaika tanggungpengawa nyaga enggau ngajar bala anak kita seratus peratus ngagai sekula enggau pengajar tang apai indai mega patut bejalaika tanggungpengawa sida ngajar bala anak sida ba rumah,” ku iya nerang enggau silik.
Tambah iya, Wawasan 2020 semina tinggal setaun aja agi lalu rebut mih semua peluang ke dikena ngulihka penemu enggau naka pemayuh ti ulih lalu enti kitai ke nyadi apai indai enda beratka pekara tu lalu kita semua deka tinggal pemansang.
“Berindik enggau nya, aku deka nangkan ditu ke alai jam nya nadai nganti kitai tang jam deka terus beputar enda nganti kitai lalu rebut mih peluang nya dikena ngulih penemu enggau naka ulih.
“Enti bala anak kitai diberi pelajar ti chukup, lalu kitai empu mega bulih penyamai sereta ari penyamai bala anak kitai dia kitai ulih ngubah pengidup sida nyengkaum diri sebilik,” ku iya.
Terang Francis agi, dalam pekara nya,lebuh ke meri pelajar ti manah ngagai bala anak kitai, kitai ke nyadi apai indai lalu anang sesekali enda ingat nyikap semua perengka sekula dikena bala anak kitai.
“Ambika chunto, ba rumah apai indai patut nyendiaka bangku enggau mija ngambika bisi dikena sida belajar lalu enti kitai enda ulih nyendiaka perengka nya dia sida napi penanggul maya ke belajar.
“Nya alai, pekara tu patut dikemeratka semua apai indai laban gaya palan ti nyamai nya deka mai penyenang ngagai bala anak kitai belajar sereta semua tu patut disedia ungkup bala anak kitai,” ku iya.
Sama bisi ngulu program nya, Temenggong Kuek Aik Seng, ex-Ketuai Raban Bansa China ba Sri Aman, Datuk Tan Chong Meng sereta bala orang ke bisi melanja program nya.