Anda di sini

Penembu projek solar ngelantangka seput peranak Tr Linggi di Ulu Kakus

KUCHING: Peranak rumah panjai Tuai Rumah (Tr) Linggie Layang di Ulu Kakus, Tatau, Bintulu sebedau tu ti begunaka mayuh belanja bebelika minyak diesel dikena ngidupka injin api, diatu berasai lantang seput pengudah projek solar rumah nya tembu.

Projek solar ba Lot 1, Block 33, Kakus Land District 97200 Tatau (nama baru), ti sebedau tu dikelala enggau nama Nanga Sikit, Ulu Kakus, Tatau, Bintulu berengkah dipejalaika kena 21 Disember 2018 sereta tembu dalam bulan April 2019.

Penembu projek nya udah nyendiaka bekal kuasa karan 24 jam ngagai 21 pintu Rumah Linggie Layang nya.

Projek nya dipejalaika ari baruh Skim Bekal Kuasa Karan Alternatif Menua Pesisir (SARES) ti dikemansangka Perintah Sarawak, Opis Menteri Utiliti enggau Sarawak Energy.

Berindik ari ulih ngasaika bekal kuasa karan 24 jam nya, kena 31 Mei 2019 tu tadi, peranak rumah panjai nya ngatur pengawa miring ba Stesyen Sistem Solar ti semak enggau rumah panjai nya.

Penyanding penemu rumah panjai nya, Sang Sanjan, 40, ngarika peranak rumah panjai nya meri terima kasih ngagai sida ti bekaul.

“Projek tu udah meri penguntung enggau pengelantang kelebih agi bekaul enggau belanja.

“Diatu enda ibuh agi bebelika minyak diesel dikena ngidupka injin api laban udah bisi sistem kuasa karan ti lebih ngelimat, likun sereta beresi,” ku iya madah ngagai Utusan Borneo.

Berebak enggau tu Sang madahka peranak rumah panjai nya mega ngarapka perintah nengeri sereta perintah besai ulih enggau lengkas ngemanahka jalai ti pemanjai 7 km ari jalai kayu batang (jalai besai) nuju rumah panjai.

Iya madahka enti jalai nya manah, nya deka ngemuntang sereta ngelempungka peranak kelebih agi peranak rumah panjai nya bejalaika aktiviti ninting hari.

“Peranak ngarapka perintah nengeri enggau perintah besai nyata agi sereta enggau pematut bejalaika projek pemansang ke pengelantang pendiau rayat kelebih agi di menua pesisir,” ku iya.