Anda di sini

Liwan nutup Pesta Merit, Gawai Dayak ba Rumah Anthony Jiram

 Menteri Muda Bekal Ai Menua (JBALB), Datuk Liwan lagang bejadi sereta nutup aktiviti iya nya Pesta Merit enggau pengerami Ngiling Bidai 2019 ba Rumah Anthony. (Ari kiba) Penghulu Esit Nalo, Penghulu Wong Kie Ing, Pengulu Daniel Dian, Tuai Rumah Anthony nerima tikai ari Liwan disempulang Pemesai Opis Pililih Menua Kapit Elvis Didit enggau Temenggong Wilfred Billy Panyau.
NUTUP DUA PENGERAMI: Menteri Muda Bekal Ai Menua (JBALB), Datuk Liwan lagang bejadi sereta nutup aktiviti iya nya Pesta Merit enggau pengerami Ngiling Bidai 2019 ba Rumah Anthony. (Ari kiba) Penghulu Esit Nalo, Penghulu Wong Kie Ing, Pengulu Daniel Dian, Tuai Rumah Anthony nerima tikai ari Liwan disempulang Pemesai Opis Pililih Menua Kapit Elvis Didit enggau Temenggong Wilfred Billy Panyau.

KAPIT: Menteri Muda Bekal Ai, Datuk Liwan Lagang ti mega Kaban Kunsil Nengeri Belaga udah bejadika pengerami nutup Pesta Merit ti keterubah iya diatur berengkah kena 7 Jun nyentuk ke 9 Jun ba  Rumah Anthony Jiram, Nanga Mujan Ili, Merit.

Sepengudah tiga hari berami ba rumah panjai, Liwan mega bejadi pengerami Ngiling Bidai ba rumah panjai nya lalu ke kelai dikena ngujungka pengerami Gawai Dayak 2019.

Penyanding Penemu ba Opis Kepala Menteri, Datuk Alexander Nanta Linggi ke mega Kaban Parlimen (MP) P.215 Kapit bejadi ‘Pesta Nanga Merit Edisyen Ketrubah 2019’.

Konstitusyen Parlimen Kapit berengkah ari Nanga Merit nyentuk ke Song. Lalu Konstitusyen Nengeri ke dipegai kandang parlimen nya Pelagus, Bukit Goram, Katibas enggau sebagi ari pelilih menua Belaga.

Nanga Merit Pelilih Mit entara Kapit enggau Belaga. Lalu bisi dua jam penyauh enti ngena bot 400 HP ari Kapit.

Chairman Pengatur program nya, Pemesai Opis Pelilih Menua Kapit, Elvis Didit madahka Opis Pelilih Menua Kapit udah diberi tanggungpengawa ari Menteri Muda ba Opis Kepala Menteri, Datuk Liwan Lagang (Kaban Kunsil Nengeri Belaga) ngatur Pesta Merit ti keterubah nya.

Nanga Merit nya siti pelilih mit di Kapit. Bisi beberapa iti batang aktiviti baka skim parit enggau entali ai dikena bumai paya ba Pelilih Menua Kapit. Tebilang mega endur ngulihka batu arang ti ngasilka 80,000 metrik tan sebulan.

Mayuh macham program bisi diatur baka sukan rayat, pekit nginti, pekit nagkap serati, pekit pemajik, lumba bot, aktiviti bekayuh/bekayak, bansal alai bejual, bansal dikena mandang ke barang enggau kaunter ti dibuka mayuh bengkah ejensi Perintah Besai enggau Nengeri.  

Pesta Merit ukai semina ungkup peranak ke diau ba Pelilih Mit Merit tang mungkur bala komuniti ke diau ba pasar Belaga ditesau ngulu pengerami nya. Pengerami Pesta Merit mai penyerakup mayuh ngagai pupu raban bansa, baka Iban enggau Baketan ari Merit, Sekapan, Punan enggau Tanjung datai ari Belaga. Tu pengerami pupu raban bansa. Ngarapka tu ulih nyadi siti program ti manah enggau narit ati dikena ngaga promosyen mayuh bengkah macham main enggau adat asal.

Sama bisi datai ngulu pengerami nya, Menteri Muda Lumba enggau Main Sarawak, Datuk Snowdan, Kaban Parlimen Hulu Rajang Datuk Wilson Ugak Kumbong,Kaban Kunsil Nengeri  Pelagus Nyabong Ijang,Temenggong Wilfred Billy Panyau, Pemancha Yong Thu Fook, Penghulu Gruna Mawan, Penghulu Wong Kie Ing, Penghulu Pasang Tibak, Penghulu Esit Nalo, Penghulu Sia Shui Poh, Penghulu Daniel Dian, Penghulu Setepan Jana, Kapitan Neo Kei Hoe enggau bala bukai.