Anda di sini

Kompeni nanam baru kampung di Song dipinta anang ngereja tanah PMPG - Munan

Komiti Tanah NCR enggau PMPG Sungai Bangkit/Katibas Tengah ti begempuru, empai lama.

Dikarang Judan Bungap

SIBU: Parti Pekerja Sarawak (SWP) minta kompeni ti ngereja pengawa nanam baru kampung enda sepeneka tama tanah Pemakai Menua enggau Pulau Galau (PMPG) enggi rayat Sungai Bangkit, Kabitas Tengah di Song.

Presiden parti, Munan Laja madah, enti kompeni nya diberi lisin nanam baru kampung, sida semina ulih nanam ba Tanah Nengeri aja tang enda ulih ba PMPG lebih agi enti orang ngempu menua nya enda setuju.

"Atur ti udah ditetapka ngagai kompeni ke nanam baru kampung tu iya nya sida semina nanam ba Tanah Nengeri aja.

"Tang ba kes di Song, sida nyau ngereja kampung tauka nebang kayu ba PMPG rayat Sungai Bangkit, Kabitas Tengah dikena nanam baru kampung enggau pun 'akasia'.

"Enti sida ngereja kampung ba Tanah Nengeri, nadai dia orang ka kiruh," pia ku iya madah ngagai pengarang berita, tadi.

Iya mantaika jaku tu bekaul enggau pengawa Komiti Tanah NCR enggau PMPG Sungai Bangkit/Katibas Tengah ti begempuru, empai lama.

Pengawa nya dikena sida berandauka pekara bekaul enggau pengawa kompeni tama tanah PMPG sida lalu ngaga siti memorandum.

Memorandum nya ngundan penemu sida sebedau deka dianjung ngagai kompeni ti ngereja, perintah nengeri enggau opis ti bekaul.

Munan ti mega Sapit Presiden Gerempung Dayak Iban Sarawak (SADIA) madahka iya besetuju enggau pengawa begempurung nya laban PMPG endang bisi kuasa undang-undang.

"Nya alai, kompeni meseti bebasaka pekara tu kelimpah piak ti bekaul enda ulih enda neritka adat PMPG," ku iya nerang.

Iya madah, di sitak Kapit, bisi 11 iti kompeni diberi lisin bejalaika pengawa nanam baru kampung ba sejuta hektar pemesai tanah.

Ku iya, ari pemesai nya, tanah PMPG enggau NCR bela bisi dibungkur kandang projek.

"Enti PMPG enggau NCR rayat nyau disengkaum ba projek tu, iya meseti bisi polisi tang polisi nya diatu enda dikena taja kompeni majak ngereja," pia ku iya.

Berindik ari nya, Munan ngarap opis enggau sida ti bekaul bela berunding nyaup rayat di menua nya ngiga chara mutar sebedau ngaga pemutus ti pulai ke pemaik ngagai kedua-dua piak.

"Kami ba SWP enggau SADIA deka semampai beratika projek nanam baru kampung tu nengah kuasa kami dikena nentuka undang-undang dipejalai nitih pematut ngambika hak rayat ke beempu tanah ulih dijaga," ku iya ti mega peranak asal pelilih Song.