Anda di sini

KM deka bejadi pengerami Hari Gawai Dayak renggat nengeri

Advertisement
 Uggah nyuaka surat kangau ngagai Abang Johari nyadi orang ti pemadu dipebasa ba pengerami Gawai Dayak renggat nengeri, seraya disempulang Manyin (tengah) sereta (ari kiba) Ranum, Henry, Ik, Dr. Jerip, Sagah enggau (ari kanan) Nanta, Penguang, Gerawat sereta Dr. Rundi, kemari.
NGANGAUKA NUAN DATAI: Uggah nyuaka surat kangau ngagai Abang Johari nyadi orang ti pemadu dipebasa ba pengerami Gawai Dayak renggat nengeri, seraya disempulang Manyin (tengah) sereta (ari kiba) Ranum, Henry, Ik, Dr. Jerip, Sagah enggau (ari kanan) Nanta, Penguang, Gerawat sereta Dr. Rundi, kemari.

KUCHING: Kepala Menteri, Datuk Patinggi Abang Johari Tun Openg deka bejadi pengerami Hari Gawai Dayak renggat nengeri ba Hotel Imperial kena malam 15 Jun tu.

Surat ngangauka iya datai bejadi pengerami nya disuaka maya penemuai basa ari komiti pengatur Gawai Dayak renggat nengeri ti betuaika chairman komiti, Sapit Kepala Menteri Datuk Amar Douglas Uggah Embas ba opis iya (Abang Johari), pagi kemari.

Nyempulang Uggah, kaban komiti nya ti mega bala kabinet nengeri nyengkaum Menteri Pelajar, Sains enggau Pansik Teknologi Dato Sri Michael Manyin Jawong; Menteri Utiliti Dato Sri Dr Stephen Rundi Utom, Menteri Muda Pemansang Tanah Adat Datuk Roland Sagah, Menteri Muda Kaunsil Kandang Menua Datu Dr Penguang Manggil sereta Menteri Muda Perengka Pengangkut Datuk Dr Jerip Susil.

Bala bukai ke sama nyempulang Uggah baka, Kaban Parlimen Kapit Datuk Alexander Nanta, ADUN Mulu Dato Gerawat Gala; ADUN Opar Dato Ranum Mina; ADUN Tasik Biru Dato Henry Jinep; ADUN Kedup Martin Ben; ADUN Bukit Semuja John Ilus sereta Sekreteri Opis Menteri Betanam Betupi Moden, Tanah Adat enggau Pemansang Kandang Menua Datu Ik Pahon.

Uggah ti mega nyadi Menteri Betanam Betupi Moden, Tanah Adat enggau Pemansang Kandang Menua madahka gempuru nya nyadi pengerami ninting taun komiti nya.

“Kami madah sereta minta Kepala Menteri ngambika iya ulih baka meri jaku lalau ngagai raban bansa Dayak pasal pengawa ke ulih dipejalaika dikena ngenegapka kaul enggau penyerakup semua peranak Sarawak dalam gaya menua ke diatu,” ku iya.

Nambahka nya, Uggah madahka Abang Johari mega bisi dikangau nyadi pengabang ti pemadu dipebasa ngagai siti agi pengerami Gawai Dayak ti diatur ketuai raban bansa Dayak Iban Bagi Menua Kuching kena 18 Jun tu.

“Kitai bisi siku Temenggong Iban, siku Pemancha, tujuh Penghulu enggau 40 iku Tuai Rumah dalam bagi menua Kuching.

“Sida deka mantaika beberapa pekara ti ditapi raban bansa ngagai Kepala Menteri baka bekaul enggau rumah, pelajar, pekara rama enggau ke bukai,” ku Uggah.

Advertisement