Anda di sini

Mensia mayuh berengkah mulaika diri pengudah ngintu Gawai di rumah panjai

Advertisement
 Mensia mayuh ke sama bela nganti deka mulaika diri ngagai palan ke dituju di Terminal Kapit.
PULAI: Mensia mayuh ke sama bela nganti deka mulaika diri ngagai palan ke dituju di Terminal Kapit.

KAPIT: Udah ke ngintu pengerami Gawai Dayak, diatu beribu iku orang mupuk mulaika diri ngagai endur sida ke gawa lalu bala nembiak sekula ti nampung pelajar mega mupuk mulai ke diri ngagai palan alai sida belajar.

Baka pengerami besai ke bukai di menua tu baka Taun Baru China, Gawai Dayak enggau Hari Raya, udah nyadi tradisyen enda ngira penanggul geografi tauka penyauh, semua orang nguji pulai ngagai rumah panjai ngambika sama berami ngintu pengerami enggau bala diri sebilik. Pengerami ti baka tu mih nyadi siti peluang alai begulai sereta negapka agi kaul eenggau pangan diri.

Pengerami Gawai Dayak berengkah pengudah tengah malam 31 Mei lalu ditampung dua ngagai tiga hari udah nya. Pengerami Gawai mega diintu nyentuk ke udah tembu pengawa Ngiling Bidai.

Dua minggu sebedau Gawai, kekadang tengah bulan Mei, mayuh bala orang ari mengeri pulai ngagai pulai ngagai menua diri empu di Kapit ngena ke bot ekpres tauka bebai ke perengka pengangkut diri.

Nyadi siti pasar di menua ulu Sungai Rajang enggau penyauh 166 kilometer ari Sibu,ngena ke bot ekpres nyamai agi sereta jampat.

Ari Sibu ke Kapit pengelama tiga jam lalu nitih ke gaya ai sungai. Bisi tiga belas kali pejalai bot ekpres sehari ari Sibu ke Kapit. Ekpres ti keterubah bekejang ari Sibu ba jam 5.45 pagi lalu pejalai bot ti ke penudi endar iya nya pukul 2.30 ngalihari. Pejalai bot bekejang ari Sibu selang setengah jam sekali. Ari Kapit pejalai bot keterubah bekejang pukul 6.40 pagi lalu pejalai bot ke penudi endar iya nya 3.15 lemai.

Orang ti deka ke Belaga, sida mega ulih nepan bot ari Sibu ngagai Belaga tauka Sibu ngagai Putai, ulu Sungai Baleh ke alai pengawa ti ngaga Tekat Ai Baleh ti diperambu benung digaga. Pejalai bot ari Sibu ke Belaga sepengelama sepuluh jam lalu Sibu ke putai urung enam jam.

Bala ti mulai kediri ari Sabah, Miri, Bintulu enggau Kuching ti nengah jalai darat tebal agi milih ngena kerita 4WD.

Jalai Kanowit ngagai Kapit ke sepenyauh 88 kilometer balat mayuh pemar. Ukai mudah deriba laban jalai ke sepenyauh 22 kilometer nya bebukit ti dibungkur tanah liat. Nya siti kandang menua ti bebukit lalu enda engkeman ditengah entukar mit ti nengah Jalai Ladang Sawit- ‘Jalai Katibas Pelita Kelapa Sawit’ ari Tamalat ngagai Ngemah.

Taja pan semina 22 kilometer aja, tang peguna jalai nya ngambi timpuh enam puluh nyentuk ke lapan puluh minit nengah jalai ti lichin enggau tanah luchak. Ungkus nengah jalai tu mimit agi laban tikit pulai ari Miri ke Kuching mar maya musim pengerami.

Terminal Kapit ti ngelama tu sunyi nyadi richah enggau bemacham aktiviti ketegal penyampau penumpang ke mayuh. Mayuh penumpang ti deka bekejang ari Kapit nganti gintir pejalai sida ari Kapit ke Sibu nuju palan ti deka dituju sida.  

Dikena napi penyampau mensia ke mayuh, Opis Sungai Sarawak (LSS) dibantu RELA enggau Opis Marin diengkah ba terminal dikena nentuka trafik sungai nya lanchar.

Advertisement