LUBOK ANTU: Semua pupu raban bansa patut ngemeranka kaul ti ulih bebatak asur enggau pangan diri, bebasa sereta sama ngintu pengelantang begulai laban nya ti nyadi pekara pemun dalam ngetanka penyerakup di nengeri tu.
Penyerakup ke diasai diatu, patut mega ditan semua raban bansa, ti sama ngempu hak ke sebaka nyadi rayat Sarawak enggau Malaysia kelebih agi.
Kaban Parlimen (MP) Lubok Antu, Jugah Muyang madah tu pekara ti dikemeran pupu bansa ti dikedeka perintah lalu rayat patut bepegai tegap sereta ngenegapka agi pengelantang sereta terus ngemeranka ulah ti ulih bebatak asur dikena ngetanka penyerakup begulai.
“Beserimbai enggau nya, pekara tu endang berat laban nya nyadika kunchi ngagai politik ti sebela sereta pemansang ekonomi, enggau nya, aram kitai sama ngetanka pengelantang ti udah bisi.
“Tu nyadi polisi perintah besai ti ngemayuhka aktiviti main asal mayuh bengkah raban bansa, lalu kitai deka ngangkatka pemereti ati sereta pemerat guna main asal ti bisi ba menua tu,” ku iya nambah.
Iya madah munyi nya ba pengerami makai malam begulai enggau Gerempung Raban Bansa Chew ba pasar Engkilili ba ditu bedau lama.
Penemu politik ti bebida nya patut beri ke tisi lalu penemu ti sebaka nya patut dijapai dikena nyapai juluk ati nya, ku iya nambah ke jaku.
Jugah udah nya minta semua komuniti pupu bansa ti datai ba Lubok Antu besaup sereta bekerejasama nuju jalai pemansang ba kandang menua Lubok Antu ngambika pelilih menua nya pansut ari statistik ba dalam 10 pelilih menua ti pemadu seranta di Malaysia.
“Tu tanda ti nyata, udah datai maya bala kitai ke diau ba Lubok Antu enda ngira Iban, Melayu tauka China ngambika kitai berunding jauh agi lalu ngelangkar pengawa ti patut ngambika pansut ari statistik 10 pelilih menua ti pemadu seranta ba Malaysia tu,” ku iya.
Iya madah pengerami ti bakanya jalai ti manah dikena beserakup enggau rat agi entara perintah enggau raban bansa China ba kandang nya.
“Kitai pechaya pengerami ti bakatu iya nya siti peluang ti manah ngagai Kaban Parlimen enggau rayat ba kandang menua nya betukar buah runding enggau penemu lalu deka dibai ngagai renggat ti tinggi agi.
“Kitai pechaya enggau komitmen rayat ngagai perintah enggau semengat kerelasama ti diberi lalu semua perambu pemansang perintah ulih dipejalai enggau lanchar,” ku iya agi.
Berebak enggau nya, ba pengerami ti sebaka Jugah mega bisi ngungkupka geran sepenyampau RM10,000 ngagai Gerempung Raban Bansa Teo Chew Engkelili.
Iya ngarapka enggau bantu nya, nya ulih dikena ngemansangka aktiviti-aktiviti komuniti China ba Pasar Engkelili.
Sama bisi datai ngulu pengerami makai malam nya Kaban Kunsil Nengeri (ADUN) Engkelili, Dr Johnical Rayong Ngipa.