MIRI: Nyaga imej kelebih agi ti mai nama bansa diri beguna amat dalam bemacham pupu bansa di nengeri, pia ku Menteri Utiliti Sarawak Dato Sri Dr Stephen Rundi Utom.
Ku iya, ngintu kaul enggau pangan diri sereta raban bansa bukai mega nyadi entara pekara positif ti patut ditanka.
“Imej kitai baka raban bansa Dayak, ukai semina ba adat tauka tradisyen nyengkaum ngepan asal, tang chara kitai mai diri lebuh ke begulai enggau sistem ke dikena kitai mutar tauka ngaga sebarang aja pekara mega mesti nguing ngagai tuju ke positif,” ku iya.
Iya bejaku munyi nya ba pengerami Gawai Dayak Bazaar 2019 ti diatur Serakup Gagasan Anak Dayak Sarawak (GADS) ba palan engkah entukar Pasar Baru Permyjaya ditu, malam ensanus.
Sama bisi ngulu pengerami nya ex-Panglima 1 Divisyen Soldadu Malaysia Leftenan Jeneral Datuk Stephen Mundaw, Ketuai Pemesai Eksekutif LAKU Management Sdn Bhd Ir Franklin Ucar, Ketuai Raban Bansa Iban Bagi Menua Miri Pemancha Wilson Siang Lim, Penyanding Penemu II GADS Jetli Jelian, Presiden GADS Vicky Gulin Shandom, Chairman Pengatur Gawai Dayak Bazaar 2019, Clare Cinderella Kom enggau temuai ti dipebasaka ke bukai.
Ku Kaban Kunsil Nengeri Kemena, bazaar nya dibuka ukai semina nyendiaka palan ngagai raban bansa Dayak nambahka penatai pemisi, tang mega mandangka daya idup Dayak ngagai orang luar.
“Kelimpah kitai begempuru beserimbai enggau pengerami ngintu Gawai kelebih agi ngagai sida bukai ti enda ulih mulaika diri ke menua, peluang nya mega dikena kitai nambahka penatai pemisi.
“Ba awak ke sama, patut diingat mega chara kita bejual tauka bedagang ti enda tau enda sistematik laban nya lalu mandangka mej kitai.
“Tentu kitai enggai ngaga pengawa ‘semadi nadai aja’, laban nya mega mesti seriris lalu mandangka penyerakup kitai nengah kerejasama negapka penyerakup enggau pengelantang ke udah bisi,” ku iya.
Iya meransang raban bansa Dayak ngambika terus berakup nengah chara beraban tauka serakup ti ditumbuh dikena mantu awak ke tetiap sada sida dipendingka.
Ba pengerami nya, Dr Rundi mega bisi ngungkupka RM30,000 ngagai GADS dikena ngatur baazar nya baru dudi ila.
Dulu ari nya, Clare ba jaku pengelalu iya madahka bazaar nya nerima sambut ke manah, sekalika ari orang dagang tauka ari mensia mayuh ke datai kia.
“Bazaar Gawai Dayak nya ditapat mensia mayuh lebuh ke dibuka lalu nyadi pematak penatai temuai di Miri.
“Nya alai, kami amat ngarapka ulih ngatur nya besai agi taun baru sereta mega ngarap bisi sukung belama ari perintah nengeri,” ku iya.
Iya mega meri terima kasih ngagai sukung ke udah diberi sebedau tu seraya ngarapka perintah nengeri ulih berunding ngintu renggat nengeri Gawai Dayak Bazaar di Miri.