Anda di sini

63 buah NGO nerima pemeri RM289,000 ari PUSAKA

Advertisement
 Awang Tengah nyuaka pemeri ngagai sebengkah gerempung seraya diperatika Naroden (tiga ari kiba) enggau Len (dua ari kanan) sereta ke bukai. — Gambar Chimon Upon
ARI PUSAKA: Awang Tengah nyuaka pemeri ngagai sebengkah gerempung seraya diperatika Naroden (tiga ari kiba) enggau Len (dua ari kanan) sereta ke bukai. — Gambar Chimon Upon

KUCHING: Perbadanan Kemajuan Perusahaan Kayu Sarawak (PUSAKA) enggau anak kompeni iya udah nyuaka pemeri sepenyampau RM289,000 ngagai 63 buah gerempung pengintu pengelantang pendiau enggau gerempung ukai dikuasa perintah (NGO), kemari.

Pemeri nya disuaka Sapit Kepala Menteri ti mega Menteri Pemansang Mengeri enggau Pengeraja Asal II Datuk Amar Awang Tengah Ali Hasan.

Nitih ku Awang Tengah pengawa meri pemeri nya dipejalaika kenyau ari taun 1982 asil ari buah runding Tuia Megai Menua ( TYT) Tun Pehin Sri Abdul Taib Mahmud maya iya ke agi nyadi Kepala Menteri suba.

“Taun tu genap 37 taun PUSAKA ngatur tu, lalu tuju iya  ngambika ulih bekunsi penyulut ke dijapai enggau raban bansa ti diarika gerempung pengintu pengelantang pendiau, pengasih, jalai pengarap sereta gerempung pelajar.

“Taja pan pemeri tu enda besai tang kitai deka bekunsi, kitai ngarapka ungkup belanja tauka pemeri tu ulih dikena mantu gerempung bejalaika aktiviti ke pemanah kaban gerempung,” ku iya ti mega nyadi Chairman Lembaga Pengurusan PUSAKA.

Pengerami nyuaka pemeri tiap taun PUSAKA enggau anak Kompeni PUSAKA diatur ba Dewan Seminar PUSAKA, Wisma Sumber Amal ditu, kemari.

Berebak enggau tu Awang Tengah mega ngarapka mayuh agi organisasyen sereta badan korporat sama mantu orang ti begunaka bantu.

“Ba penemu aku, penyulut organisasyen ukai disukat nengah asil dividen tauka penatai pemisi ke diulih aja tang dalam timpuh ke sama ulih dipeda ba pengawa beratka raban bansa nengah tanggungpengawa rama.

“Tu pekara ti deka diuji dipejalaika PUSAKA enggau anak kompeni PUSAKA, kitai deka bekunsi penyulut,” ku iya ti mega Menteri Pemansang Industri enggau Orang Dagang.

Sama bisi datai, Menteri Muda E-Dagang Fatuk Mohd Naroden Majais, Menteri Muda Perambu Mengeri, Pengatur Tanahg enggau Rampa Menua Datu Len Talif Salleh sereta ke bukai.

  • oleh
  • Advertisement