SARIKEI: Pengajar iya nya orang ti megai tanggungpengawa berat pengawa nempa modal mensia dalam pemansang menua jemah ila.
Kaban Kunsil Nengeri (ADUN) Repok, Dato Sri Huang Tiong Sii madah, bala pengajar nya pesaka ti amat berega enggau pengubah ngagai rebak biak ti deka nyadi ketuai megai menua dudi hari ila.
“Siti- siti menua bepanggai ba pengeransing bala pengajar nyendiaka pelajar bekualiti ti ngemeranka pemansang diri enggau holistik lalu ngemansang daya inovasyen sereta kreativiti nembiak sekula.
“Penanggul bakatu patut diperati enggau bebendar ari bala pengajar ngambika peragam perintah enggau bansa dikena nentuka anak bansa Malaysia bulih akses pelajar ti bekualiti lalu ulih ngemujurka nya enggau manah.
“Tuju peransang tu ngambika rayat rebak biak dudi hari ila bepenemu, kreatif, inovatif, manah ulah, bisi pikir kelas keterubah lalu ulih besemekih ba renggat antarabansa,” ku iya.
Huang bejaku munyi nya maya pengerami Ngintu Hari Pengajar enggau Pengerami Mantar Gawai Taun 2019 ba Sekula Sekondari (SMK) Tinggi Sarikei, kemari.
Pengerami tu udah diatur bepalan Ba Balai SMK Tinggi Sarikei enggau udah disereta penyampau 1,000 iku orang nyengkaum bala nembiak sekula sereta bala pengajar sekula nya.
Nitihka Huang, pengajar bisi tanggungpengawa ti besai nentuka anak-anak ka diajar nyadi orang ti manah enggau bedisiplin maya ka agi ba sekula tauka abis pelajar.
Nya alai ku iya, apai indai enggau mensia mayuh patut meri kerejasama ti manah enggau bala pengajar sekula ngambika anak manah ulah sereta bisi tikas disiplin ti tinggi.
Berindik enggau nya, Penulung Pemesai Opis Pelajar Pelilih (PPD), Faustino Fredrik dalam jaku iya maya pengerami nya mega madah, ari sukut nembiak sekula, pengajar disema baka kaban sereta pangan enggau berunding ba bala nembiak.
Pengajar dipebasa enggau manah sereta nyadi orang ka pemadu beguna ngagai nembiak sekula nempa kualiti nembiak ke diajar dalam aspek pengerai tubuh, peragam ati, pengarap sereta intelek kena nyapai aspirasyen sekula.
“Pengajar iya nya pun dalam nentuka pengelantang diri ngagai orang ti dipegai sida.
“Pemansang dunya enggau teknologi kemaya hari tu, nadai kala ngubah pengawa sereta sukung pengajar dalam ngajar enggau meri penemu ngagai semua nembiak sekula.
“Pengawa pengajar diatu majak pedis lalu begunaka kreativiti sereta inovasyen dikena nentuka pengawa ngajar enggau belajar ti menyana ngagai nembiak sekula seriris enggau Pelin Pemansang Pelajar Sekula Malaysia (PPPM) 2013-2025,” ku iya.
Ba pengerami tu mega bisi tujuh iku bala sekula SMK Tinggi Sarikei udah nerima ‘Anugerah Perkhidmatan Cemerlang’ (APC), Opis Menteri Pelajar Malaysia (KPM), lalu enam iku ke bukai nerima ‘APC Highians’.
Sama bela datai ba pengerami tu iya nya Prinsipal SMK Tinggi Sarikei, Ting Sing Teck.