SIBU: Mensia mayuh ti deka pulai ke menua nyambut Gawai Dayak ditangkan meli tikit ekspres tumu agi ngambika enda besekut ila.
Pemantur Kontroler Opis Sungai-Sungai Sarawak (LSS) Hatta Morshidi madah, diatu udah tau alai meli tikit ekspres dulu dikena pulai Gawai ti deka datai.
“Bisi mega endang udah meli dulu ngambika enda besekut maya orang bereta pulai ila nengah Penyangkai Ekspres Sibu (TPS),” pia ku iya madah ngagai pengarang berita.
Baka sebedau tu mega ku Hatta, penyampau mensia mayuh ke nepan ekspres deka nambah dalam seminggu sebedau Gawai Dayak.
Iya madah, pejalai ari Sibu-Song-Kapit pemadu kisuk ninting maya Gawai Dayak.
Ketegal nya ku iya, ekspres deka ditambah mayuh agi nyema penyampau mensia mayuh nambah.
TPS ulih ditapat urung 2,000 iku sehari lalu penyampau tu dipelabaka deka nambah manggai 8,000 maya gawai majak semak.
Ba pekara bekaul, LSS deka ngatur kerejasama begulai enggau polis marin, Opis Tasik, Opis Menteri Pengawa Dagang Dalam Nengeri enggau Pekara Orang Bebeli Barang (KPDNHEP) enggau Opis Sukarelawan Malaysia (Rela) bejalaika operasyen beserimbai enggau gawai tu.
Operasyen keterubah diatur berengkah 24 nyentuk 30 May lalu ditangkan renggat kedua ari 3 nyentuk 9 Jun.