DARO: Sida kunteriktor ka udah diberi projek patut ngereja nya enggau manah sereta nitihka spesifikasyen ka udah ditetapka kena ungkup guna rayat.
Kaban Kunsil Nengeri (ADUN) Daro, Safiee Ahmad madah ejensi pengatur dikeingat ngambika kering ati ba pengawa matau kereja ti digaga sida kunteriktor.
Ku iya, tu ukai semina deka nentuka semua spesifikasyen dititih, tang projek ditembu nitihka timpuh ti ditetapka.
“Ketuai genturung pendiau enggau bala Komiti Pemansang sereta Pengelikun Genturung Pendiau (JKKK) patut meri kerejasama mega ba pengawa matau sereta nentuka projek tu bejalai enggau mujur.
“Bala ketuai ba renggat baruh sida patut nyadika mata enggau pending ngagai perintah. Nama-nama isu enggau penanggul ba genturung pendiau meseti diputarka ngena chara ti manah,” iya nerang ngagai pemberita saritu tadi.
Seraya nambah, perintah Sarawak udah ngungkupka bantu agih belanja besai nengah Program Transformasyen Menua Pesisir (RTP) dikena ngangkat lalu ngemanahka perengkaguna sereta insfrastruktur ba tetiap genturung pendiau.
“Nya alai, peranak di rumah panjai ditangkan patut ngemeranka ati segempung enggau bisi pengangkun ba projek ti deka digaga ba menua sida,” ku iya
Ku iya, projek tu mai reti ti besai ngagai tetiap peranak di genturnga pendiau kelebih agi sida ti ba kandang menua pesisir.
“Nya kebuah, tu patut digaga enggau naka pemanah kena meri pemaik ngagai peranak di genturung pendiau,” ku iya.
Dulu agi ari nya, kenaka Hari Dua tu tadi Safiee udah bejadika pengerami nyerah taba projek pemansang rayat ba Kampung Badong, Daro.