KUCHING: Jabatan Kastam Diraja Malaysia (JKDM) Sarawak mujur nagang siti sindiket mai belalai ai bisa (minuman keras), insap enggau merechun enggau penyampau rega ke ulih dirampas sepenyampau RM200,203.92 di Sibu kena Hari Tiga tu tadi.
Direktor JKDM Sarawak, Datuk Sharifah Halimah Tuanku Taha madahka, pengawa ngerampas barang nya dipejalaika pengudah nemu aktiviti nyual enggau nyimpan ai bisa sereta insap ti dipelaba enda dikemendarka kastam ba dua premis ba kandang menua Permai Jaya Sibu.
“Nengah asil pengawa pemansik, seraban pemesai penerit adat ti bisi 18 iku raban ari Pampang Penerit Adat Sibu, Kuching enggau Sarikei ngipa ba kededua premis nya urung pukul 5.30 lemai kena 15 Mei tu tadi.
“Asil ari nya kededua premis ba Jalan Permai Jaya, Sibu udah ngujung siku lelaki China ditangkap sereta beberapa barang ti dipelabaka nadai pemendar ari kastam dirampas.
“Penyampau rega enggau chukai barang ti dirampas dijangkaka sepenyampau RM200,203.92 ti mungkur sepenyampau 8,164.76 liter ai bisa mayuh bansa, 998.25 kilogram (kg) merechun enggau 14,320 batang insanp mayuh jenama,” ku iya nengah penerang berita ensanus.
Ngenang nya silik, Sharifah madah, individu nya ditan laban dipelaba nyual ai bisa enggau insap ti bedau dikemendarka kastam ngagai klien ba kedai nya.
“Orang ke disangka nya dipelabaka udah ngena ruang atas premis kedai enggau sebuah rumah puang nyadi stor nyimpan barang ke enda dikemendarka nya,” ku iya.
Sharifah madahka, kes tu dipansik ari baruh Seksyen 135(1)(d) Akta Kastam 1967.
“Enti ditemu salah, pesalah deka diukum 10 kali lipat penyampau rega barang tauka RM100,000 tauka jil enda kurang ari enam bulan enggau enda libuh ari lima taun tauka kededuanya sekali,” ku terang iya.
Bekaul enggau pekara nya, iya madahk, JKDM minta mensia mayuh meri kerejasama nengah pengawa meri penerang pasal seberang aktiviti mai belalai barang baka insap, ai bisa(minuman keras), dadah enggau merechun.
“Mensia mayuh tau telefon ngagai Talian Bebas Tol Kastam 1-800-88-8855, ‘laman sesawang aduan awam’ iya nya http://aduan.customs.gov.my tauka Pejabat Kastam ti semak ke bisi ba serata nengeri.
“JKDM mega nyamin iya nya identiti tiap iku ke meri penerang deka dipelalaika,” ku iya.