KUCHING: Kepala Menteri Datuk Patinggi Abang Johari Tun Openg madahka Perintah Sarawak setuju melanja ungkus tambang bilun ungkup nembiak Sarawak pulai ke Sarawak ngerami Hari Gawai enggau Hari Raya Aidilfitri.
Nitihku Unit Komunikasi Awam Sarawak (UKAS), pekara nya dibantaika Abang Johari maya Majlis Berbuka Puasa Bersama Anak Sarawal ba Pusat Konvensyen Kuala Lumpur , kemari.
Ku iya dipelabaka urung 10,000 iku nembiak Sarawak diatu nampung pelajar dalam mayuh bidang ba Institusyen Pelajar Tinggi ( IPT l) di luar Sarawak.
"Baka ti udah disemaya aku maya Lan Berambeh taun nyin kemari, aku deka meri bantu iya nya tiket bilun pulai mansang nyerumba ngintu pengerami Hari Raya Aidilfitri, Gawai enggau Taun Baru Cina sepenyampau RM300,” ku iya.
Nambahka nya, Abang Johari mega madahka tiap iku diungkupka sepenyuah dua kali dipelanja ungkus tiket bilun.
"Tiap iku diungkupka sepenyampau RM600 iya nya ungkup dua kali. nama kebuah dua? Tu laban, kitai ba Sarawak bisi belaki bebini champur (bansa).
"Apai iya engka Dayak lalu indai iya Melayu. Nyadi iya ngerami Gawai enggau mega Hari Raya Aidilfitri.
"Lalu pia mega engka indai iya Cina enggau apai iya Melayu. Nya kebuah kitai meri RM300 dikena pulai mansang ngerami Taun Baru Cina enggau RM300 agi dikena pulai mansang ngerami Hari raya Aidilfitri," ku iya.
Berindik ari pekara nya, Abang Johari minta nembiak ti bedau meli tiket bilun dikena pulai ngerami Hari Gawai enggau Hari Raya Aidilfitri, patut enggau lengkas meli.
"Nya alai, sapa ke bedau meli tiket bilun dikena pulai ngerami Gawai enggau Hari Raya Aidilfitri, beli diatu.
"Beri resit meli tiket nya ngagai Sarawak Volunteer enggau Yayasan Sarawak. Kami deka mayar ngagai kita.
"Taun tu kitai ulih mayar ungkus penerebai nembiak Sarawak laban ekonomi nengeri kitai manah, kitai beserakup pengidup kitai lantang enggau ekonomi kitai bisi atur," ku iya diambi jaku ari laman web UKAS.
Bisi datai Speaker Kunsil Nengeri (DUN) Sarawak Datuk Amar Mohamad Asfia Awang Nassar, Sekretari Perintah Sarawak Tan Sri Datuk Amar Morshidi Abdul Ghani, bala menteri enggau bala menteri muda.