KUCHING: Kaban Parlimen (MP) Mengeri Kuching Dr Kelvin Yii minta Opis Komunikasyen enggau Multimedia Malaysia (MCMC) mansik sekeda kaban media rama Instagram (IG) nembiak ti beumur 16 taun ke mati sepengudah iya muai diri berindik ari ti nerima undi dalam media rama ti diengkah iya undi sekalika iya patut neruska idup tauka mati.
Iya madah bakanya dikena nemu sapa bagi sida ti patut ngempu tanggungpengawa ngundi nya ngambika sida diajar lalu patut ditangkan bejimat agi bekaul enggau penanggul deka munuh diri.
“Aku ngansak MCMC bejalaika pansik ngagai sida 69 peratus ti nyukung nembiak nya munuh diri tang aku enda minta polis bejalaika ukum semina deka meri sida jaku tangkan lalu nerenakka sida pemereti ati bekait enggau penusah nya.
“Enti bisi siku-siku orang sebarang maya madah niat tauka pengingin ati sida deka ngaga pengawa ti enda menuku baka munuh diri, kitai enda patut meda pekara nya enggau mudah tang kitai patut mantu sida tauka madah ngagai sida bantu profesional baka bantu buah runding ngagai sida,” ku iya madah ba aum pengarang berita ba opis DAP Sarawak kemari.
Iya madahka penusah ti nuntung siku nembiak indu ti mati sepengudah tubuh iya ditemu mensia mayuh ba jalai di blok rumah kedai ba MJC kena Hari Dua tu tadi.
Ketuai Polis Padawan Supt Aidil Bolhassan madah lebuh ti meresa media rama ‘Instagram’ indu nya iya bisi ngaga siti undi ba hari ti sama enggau jaku ‘PEKARA BERAT, Tulung Aku Milih D/L’ lalu bepelasarka penyampau undi nya 69 peratus kaban media rama iya milih ‘D’ ti mai reti mati.
Berindik ngau pekara nya, Dr Yii madah penyinu ati ketegal penusah bakanya nyadi lalu iya madah pekara bekaul pengerai runding nya siti penanggul ti patut dikemerat kelebih agi ngagai rebak baru berindik ari pengawa ngemaruhka orang ba media rama majak nyadi kemaya hari tu.
“Isu pengerai runding diatu udah mayuh meri empas ngagai raban nembiak laban ubah ari sukut jeman sereta mega ari media rama, ti meri peluang besai sida betapi enggau penusah dikemelika orang dalam dunya siber.
“Berindik ari nya, sekeda faktor ti mai penanggul ngagai pengerai runding iya nya nyengkaum ari penusah ruang bilik, ‘stress’ enggau kurang dijaga sereta sukung ari apai indai,” ku iya nerang.
Iya madah sentang penusah penanggul pengerai runding majak niki ba menua Malaysia ba penyampau 4.2 juta rayat Malaysia dipelabaka bisi penanggul ba isu pengerai runding nitihka pansik National Health and Morbidity Survey 2015.
Ba Sarawak, bisi dipelabaka 35.8 peratus ari peranak nengeri tu napi penusah isu pengerai runding. Tu entara penyampau ti tinggi di Malaysia lalu Sabah ti ngerikod penyampau ti pemadu tinggi iya nya 41.9 peratus.
“Isu tu ukai semina mungkur orang ti seranta aja pia mega sida ti ba kelas pengidup ti jelan penyamai enggau sida ti senang. Ba rikod, 35.8 peratus peranak nengeri Sarawak ti napi penanggul runding tu kelebih agi datai ari sida ti ngembuan status ekonomi ti tinggi,” ku iya.
Iya madah mayuh sida ti napi penusah bakatu rindu diau diri ari sida ti bekunsi enggau bejaku enggau orang bukai sentang penanggul ti ditapi sida.
“Tu ketegal sida berasai malu lalu sida melaba salah sangka tauka orang bukai ti ngakim sida sengapa,” ku iya nyemetak.
Dr Yii nekanka nya ukai tanda pengelemi dikena begiga ke sukung.
“Aku deka ngaga surat ngagai sapa sida ti benung dalam penusah enggau penanggul tauka sida ti bisi niat deka munuh diri ngambika enda takut begiga ka bantu enggau sukung.
“Mayuh gerempung ti ukai dikuasa perintah sanggup mantu sida lalu siti ari gerempung nya iya nya Befrienders Kuchings lalu bisi siti arus dikena mantu meri buah runding lalu ulih digiga sebarang maya ti lebuh beguna ka bantu tauka deka berandau ulih telipun ngagai lumur 082-242800.
“Sida bisi kaunsilor ti landik lalu arus disediaka ngambika ulih meri buah runding tauka bantu ari segi emosyen lalu nya deka diresia,” ku iya.