KUCHING: Lima buah genturung pendiau di Serian bisi nerima agih belanja sepenyampau RM10,000 ari Sapit Menteri Dagang Dalam Nengeri enggau Pekara Orang Bebeli Barang, Chong Chieng Jen dikena melanja projek mit enggau aktiviti.
Ba pengawa nya, agih belanja nya disuaka chairman DAP pampang Serian Edward Andrew Luwak ngarika Chong, ngagai pengari ari lima buah genturung pendiau nya.
Pengawa nya diatur ba palan servis DAP Serian, lalu Edward mandah ngagai sida ke nerima bantu nya taja pan bantu nya mimit tang nya meri pemaik sereta beguna bendar ngagai komuniti.
“Gaga nama deka digaga, taja pan nya mimit, kena enggau manah,” ku Edward nambah taja pan ungkup bantu nya mimit tang mai reti ti besai ngagai komuniti.
Iya madahka agih belanja ti diberi ngagai Kampung Koran Mawang dikena peranak ba kampung nya ngemanahka paip ai graviti sida.
Kampung Paun Gahat mega nerima agih belanja dikena meli bangku baru ungkup gerija kampung sida, Kampung Bentang nerima agih belanja nya dikena ngatur pengerami mantar Gawai lalu Kampung Mentung Baing dikena nyambut pengerami Hari Gawai kena 1 Jun ti deka datai.