Anda di sini

Huang udah bejadi pengerami mantar Gawai ba 28 buah rumah panjai dalam sitak Repok

 Huang (tengah) nyuaka geran MRP ngagai Tuai Rumah Naning Undong.
UNGKUP KITA: Huang (tengah) nyuaka geran MRP ngagai Tuai Rumah Naning Undong.

SARIKEI: Pengari rayat Repok, Dato Sri Huang Tiong Sii bejadi pengerami mantar Gawai lebuh ke ngelawa rumah panjai ba sitak iya kena Hari Lima nyin tadi.

Huang ke udah nemuai ngagai 28 buah rumah panjai nyentuk Hari Minggu nyin tadi madah, iya ngambi peluang maya ke ngelawa meri selamat ngagai komuniti Iban ditu ngambika ati ti gaga sereta pengelantang  nyambut Hari Gawai.

Berebak enggau nya mega, iya lalu mendingka penanggul naka projek enggau bantu ke dipinta peranak rumah panjai nya, ku iya.

Nengah awak nya mega, Huang ngagihka mayuh macham barang baka kipas siling enggau kereban dikena berumah baka ke bisi dipinta sekeda rumah panjai nengah palan servis iya ditu, ku Huang.

Iya mega bisi ngagihka geran Projek Mit Pemansang Menua Pesisir (MRP) dikena ngaga projek mit baka ngemanahka agi  jalai semin sida.

Rumah panjai ke udah ditiki iya dalam kandang tiga hari iya nya Rumah Robert, Rumah Medah, Rumah Angelessa, Rumah Naning, Rumah Adeline, Rumah Mawa, Rumah Sigat, Rumah Jupong, Rumah Endawi Buusi, Rumah Bickson, Rumah Labu, Rumah Regina, Rumah Anong, Rumah Endawi, Rumah Jambing, Rumah John,  Rumah Gari, Rumah Udol, Rumah Ubok, Rumah Rose, Rumah Musit, Rumah Bundak, Rumah Taka, Rumah Rampoo, Rumah Embas enggau Rumah Ningkang.